JEREMIA 39 - PATHIAN LEKHABU IRTHIANG C.L. Bible (BSI)

Jerusalem tûkna thu

¹ Juda rêng Zedekia inlal kum kuak le tha sômna khan, Babulon rama rêng Nebukadnezara chu sipai pâl tamtak leh hongin, Jerusalem an doia.

² Zedekia inlal kum sômhleikhatna a tha minli le sûn kuakna khan khopui banghai kha insimtir a nia.

³ Jerusalem kha an lâka ni’n chu, Babulon ram rêng le a milianhai hongin kotbâi inlaina taka khan omhmun an khuara. Nergalserezera, Samgarneboa, Thainuzel hai hruaitu Sarsekima, hruaitu sipaihai Nergal-serezera hai khom an om saa.

⁴ Reng Zedekia le a sipai murdihaiin anni kha an hmuhaiin chu, zâna khopui ata zôkna an zonga. Reng irkul ata fesuakin kul bang inhnina kâra relpatin, Jordan phâi tiang panin an rot tâka.

⁵ Khan Babulon sipai pâlhai khan anni chu irzûlin Jeriko kôl phâia khan Zedekia chu an chel tâka. Reng Nebukadnezara chu kha zoro taka Hamath ram hual Ribla khuaa omhai kuang an hruaia, kha khan Nebukadnezara chungthu an rêl pea.

⁶ Ribla khuaa khan Zedekia nâipasalhai chu hmuchakin a thathaia, Juda mi lianhai khom a that sahaia.

⁷ Kha irzoiin chu Zedekia mitru a kêlsuapai pea, Babulon rama hruai hrangin hruihrual leh a khit tâka.

⁸ Kha zoro taka khan, Babulon-hai khan rêng in le mi inhai chu an hâl insiata, banghai an insima.

⁹ A hnungkhôn taka chu sipai hruaitu Nebukadnezara’n khopuia mipui la omhai kuanga irpêkhai leh khan an rêngin Babulon tiang intângna ina a hruaihai tâka.

¹⁰ Judai rama khan mi inrianghai senkhat, ite nei loihai a mâka, anni kha grep irhuan le loihai a pêkhai sa tâka.

Jeremia insuaa omna thu

¹¹ Khanchu rêng Nebukadnezara’n sipai hruaitu Nebuzaradana chu hiang hin thu a pêka:

¹² “Fe’n lân, Jeremia zong suakin satakin enkol roh. Ama chu dengintheitir no’n lân, a inuam murdi tho pe ro,” a tia.

¹³ Khaang khan Nebuzaradana le Babulon rama hruaituhai, Nebusazbana le Nergal-serezera le mi lian danghai le,

¹⁴ hrungtu hual sûnga irthokin a ni hruai suaka, Ahikama nâipa Gedalia, Safana tupa enkolna hnuaia a ni siaa, ama’n ki in damtaka ki tung theina hrangin a ingaitua hrang a ni. Khaang khan mi danghai kuang ki iom a ni.

Ebedmeleka tûngna

¹⁵ Hrungtu irhuan sûnga ki la om mai laiin, Rengpa’n a nin hrila,

¹⁶ Ethiopia mi Ebedmeleka inhrilin Rengpa Itinrêngthothei, Israelhai Pathianin a ni ti, “Tho hranga ki iti angin hi khopui chunga hin vângsakna ni loiin siat theina ki intungtir hrang a ni. A hong tung tena chu kha kha hmu hrangin, kha khan om a ti.

¹⁷ Khan keima, Rengpa hin nang hrung inzôk ki ta, mi a ni chihai kuta pêk ni no chi ni.

¹⁸ Nang inzôktir ki ta, thatin om no chi ni. Ni ni iam ngit sikin ni hringna inzôk ni ti. Keima Rengpa’n ki iti a ni,” tiin.