JAKOBA toc2 JAKOBA 4 - PATHIAN LEKHABU IRTHIANG C.L. Bible (BSI)

Rammual leh rual irchangna

¹ Nin laia irdoina le irsualnahai hi khôtak ata hong suak ma ni? Hoina nin nuama, nin milung sûnga irdoina intung ngaitu ata ni ma mo?

² Nin irzuka, nei mak chêi, mi nin thatpuia; nin hnarsaa, nei thei mak chêi, nin irkhalin nin irdoia; Pathian nin ngên no sikin nin nuamlam nin ihmu ngai loi a ni.

³ Nin zong khomin nin zong dik no sikin hmu mak chêi, inhoina’n hmang nin tuma.

⁴ Iamna boihaio! Rammual rual irchangpui hi Pathian râl nina a nih ti nin inhriat no ma ni? Rammual rual ni hi a nuam murdi’n chu Pathian râla a irsiam a ni.

⁵ Lekha thu’n, “Einia Pathianin irtha a isia hin irzukna lian tak a nei,” a iti hi dik loi hrangin nin iiam ma ni?

⁶ Khasikin, Pathianin lungkhamna a ni ipêk hi a lian ual. Pathian Thubu’n, “Pathianin lârirpâkhai a doia, Irngaiintômhai chu lung an kham ngai,” ti a ni.

⁷ Khasikin Pathian kuang irpelût unglân, Diabola chu doi roi, khanchu nangni rotsan a ti.

⁸ Pathian nâi roi, ama khomin nangni nâi a ti. Mi sualhaio, nin kuthai irsûkinfâi unglân, mi vârillekhaio, nin milung irthiangtir roi.

⁹ Lunginzîng unglân, beiindong unglân, chap roi; nin innuina kha beidonga chang sianlân, nin raifânna kha ngûina chang ri se.

¹⁰ Rengpa makunga irngaiintôm unglân, khanchu nangni chôiirsâng a ti.

Urêng hrilsiatloi hrang

¹¹ Urênghaio, irhrilinsiat irhlôm no roi. Tukhom a urêng hrilsiat mani, dem mani chu Dân a hrilsiata, Dân a idem a ni; Dân ni demin chu, Dân zômtu ni mak chea, roirêltu ni ni.

¹² Dân pêktu le roirêltu, Pathian inkhat vai a om. Ama vai kêng mi saninhring theia irhmangtir theitu chu a ni. Nang, tualbômhai dem ngaitu kha tu mo ni ini?

Irsor loi hranga hrilna

¹³ Irngai u ta, nangni, “A vuan mani, nangtûk mani, kho khuaa mo khat fe ei ta, kha hmuna khan kum khat sum bepâr va tho ei ta, sum tamtak van pung ei ti,” tituhaio.

¹⁴ Nangtûk hin itin mo nin hringna kha a iom hrang khom inhre mak chêi. Sûm, sôtnote a hong inlanga, a iboi nôk ang hi nin ni.

¹⁵ Khasikin, “Rengpa’n sa a ti chu dam ei ta, khahai kha tho ei ta,” nin iti hrang a ni.

¹⁶ Atûn hin chu lârirpâk takin nin irsora. Khaanga lârirpâk taka om kha sual a ni.

¹⁷ Khanchu, thil sa tho hrang inhriat chaka tholoi chu a ta hrangin sual a ni.