ISAIA 5 - PATHIAN LEKHABU IRTHIANG C.L. Bible (BSI)

Grep irhuana hla

¹ Ki inuamtak ta hrangin hla hong sak ki ti, Ki inhroi tak grep irhuan hla chu. Ki indit takin grep irhuan a nei ta, Mual chung le irnêng sana taka khan.

² Khur a choia, lung irkhamin, grep sa zât chi a phuna, A laia a enna hrang irpuk a siama, Grep tui sômna hrang khur a choia; A ra irchang a nghâkhmoa, a hong ra’n chu a dol an ni vinga.

³ Jerusalem le Judai rama mihaio, Grep irhuan le ei irhla lam dân hi, hong ngaitua ta hi roi.

⁴ Ki insâp nêka tam ki grep irhuana, Imo ki la insâp mai hranga? Grep ra sa hmu ngêt hrangin ki tuma, a dol inzenin a ni ra pea;

⁵ Itin ual takin mo ki la isoisakhai hrang? Nang hong hril nôk ki ti, a dôn chin ki ta, inramtir ki ti, a dôn irdoihai insiatpai ki ta, ramsahaiin sirpha an ti.

⁶ Mapai ki ta, a ôn sât ta no ning. A hmun khom chuan infâi ta no ning, hloi ilhling neiin sip zoi a ta, sûmhai thu pe ki ta, rua inthotir ta no ning.

⁷ Itinrêng Rengpa irhuan chu Israel in sûng mihai hi an nia, Judai rama mihai hi a inhroihai tak chu an ni. Diktaka roirêl sabeiin, mi that an nuam ngaia, khannisian chardonga an khêk irhâi a hmu intamhai ta.

Mi sintho saloi

⁸ Mi danghai nêka, tam ualin, irhuan hmun lian thohaio, nangni intak pe a ti. Tûte irleng ta no nihaia, beidong tuangin nin bingin la om nin ti.

⁹ Itinrêng Rengpa’n ki mikuar inhriata hin, “Hi in lian le satak takhai hi, ram zoi a ta, a lua hrang mi om no nihai.

¹⁰ Grep irhuana a ra tîn sôm suakna hmuna, tîn hni vai a ra hmu ni ti, phur sôm suakna hmuna, phur khat vai ra suak a ti,” a ti.

¹¹ Zînga zu hrût phutin, zân sôta inrui ngaihai chu, intak pehai a ti.

¹² Zu hmuna serânda le perkhuang hmanga, têngrep le belemhai hmanga, zu inruia omhai chu, Rengpa sintho en nuam loiin. A kut sintho khom en nuam loiin.

¹³ Ki mihaiin an inhriat nuam no sikin, sala intâng ngêt an ti. An milianhai phîngchâmin thi an ta, mipui vântânghai khom tui inhrâlin thi an ti.

¹⁴ Mi thi khuahaiin an lei nghâka, an bâi an lei âng khum mai. Jerusalem songa milian le michînhai raifân taka omhai chu an ngûi zoi ta,

¹⁵ Mi lian le mi chîn irhnuai ving an ta, tukullianhai dok an ti.

¹⁶ Dik takin roi a rêl sikin tinrêng Rengpa chu chôiindômin om a ti, thil diktaka Pathian irthiangin, a’rthiangzia inlangtir a ti.

¹⁷ Khanchu an lêngna hmuna belrahai an irhmang ngai angin, hmun ramna hmuna sûlhai chu kêlin fa an ti.

¹⁸ Sual ata irdînthei loihai, suala irlet nuam loihai chung chu rik pehai a ti.

¹⁹ Hor hnothai sian kin hmu theina hrangin, hong tho lat ta ri sehai, Israelhai mi irthiangin a thiltum chu, ei inhriat theina hrangin, zuan tungtir ta ri se, tituhai chu.

²⁰ Thil sual le thil sa thoa, thil sa le saloi thoa, a vâr chu a zîng anga bêin, a zîng chu a vâr anga irngaiin, thil thum chu a khâ a tia, thil khâhai a thum tituhai chu,

²¹ An binga ki vâr irtia, fel irtihai ngai chu an chung rik pehai a ti.

²² Zu ina pasal sa! zu sangol irveia hrânghai chu, an chung rik pehai a ti.

²³ Fâkinrûk lâkin mi sual a sa inchangtir nuamhai ngai, mi sahai chu saloi an inchangtir ngai.

²⁴ Annihai sika hin meiin fapôl a ikâng angin, ilhling a ikâng inhek angin, an irzunghai kâng inhekin, an sa lai takin hek zoi a ti; itinrêng Rengpa dân chu zôm loiin. Israelhai mi irthiang an hnôl sikin.

²⁵ Khasika khan a nih Rengpa ningmurna chu mihai chunga a zuang itung a ni. A kut irlekin a vîkhaia. Khanchu tânghai hi inhnîng a ta, mithi ruak chu sahrok angin, kholaidunga irthek rumin, kha dôr khom khan a ningmurna hek ual maka, a kut a la thâk maia.

²⁶ Rengpa’n ram hlataka omhai hrang, irsinsiana a târ suaka, kôlkil dêna mi ikoi irhâiin a koia, irhnot takin a hong ta so.

²⁷ Sôl reng inhre loiin, irtet khom irtet loiin, a inuam khom om loiin, a in khom mu pe ngai mah, kongkhit sût khom om loiin, kekok hrui sût khom om mahai.

²⁸ An thalhai chu a’rzum insa pehai, an thal ngul khom irfûk saiin an chôia; an sakor ke mitinhai khom ngaih tak a ni, an tâli kehai khom kêllaiher angin a’rhêl dût dûta.

²⁹ An khêk irhâi khom kâmkeibaknei inrûm ang a ni, an sa sê lai chu inrûm pumin an irputpaia; tûte sut thei zât ni mah.

³⁰ Kha zoro kha a hong tungin chu, tuikhanglian irhâi nêka siatin Israel ram sûnga la hong irsok siat a ti. Ramhai chu chardong le lungzîngna’n a sipa, vâr chu zîngin a’rkhu zoi tâka.