ISAIA 31 - PATHIAN LEKHABU IRTHIANG C.L. Bible (BSI)

Pathianin Jerusalem hrung a ti

¹ Changpui hrang zonga Aigupta rama fe sakor hrâtna irnghattuhaio! sakor tâlia irnghat, an sakor chungchuanghai dârsuam a ngar sika ir-iam an ni. Israel mi irthianghai tiang irnghat nuam loiin, Rengpa lak irdon nuam mahaia.

² Ama’n chu a tho dân an hriata, thil saloi khom a tho dân an hriata, a thu sût ual no ni. Thil sual thohai chunga an kut insum an ta, anni santuhai laia khom an kut insum sa an ti.

³ Aigupta mihai hi chu mihriam pai pai an ni, Pathian ni mahai. An sakorhai khom hi sâ mai mai an ni, irtha ni mahai, Rengpa’n a kut an sumin chu changpuitu nei no nihai, an ichangpui khom irtet sa ta a ti. An ruaiin irtet that an ti.

⁴ Rengpa’n ki kuang hiang hin a ti: kâmkeibaknei hâitaka inhrûm chu belrapuhai irhâi inhriatin, a phûkinthing loia chi viat loi angin, Itinrêng Rengpa Zion tânga hong suak khan chu, a tânghai zuang hâlhai a ta,

⁵ vatehai an irbu hranga an ivuang ang hin Itinrêng Rengpa’n Jerusalem chu hrung mai a ta, hrung inhnêin sansuak mai a ti.

⁶ O Israel mihaio, “A sân tehel pe khom unglân hong kîr nôk ta roi.

⁷ Kha lai khan chu tukhom an sual ngai, tangkarua le rângachak millim an kut suakhai chu pai an ti.

⁸ Assuria chu mihriam khandai ni loiin tuk that ni a ta, mihriam irlek loi khandaiin thi a ti. Rot sianlân khom ruathartehaiin sala chelthung an ti.

⁹ Beidong takin an rêng thi a ta, a zîngbupa sipai hruaituhaiin an puan irsinsiana intânsan an ti. Rengpa thusuakin hiang hin a ti. Zion tânga a mei ir-al mai a ta, Jerusalema a lungthu khom hring mai a ti.