HLAHAI HLA 8 - PATHIAN LEKHABU IRTHIANG C.L. Bible (BSI)

¹ Nangma hi chu ka nu irhnûk lai, ki sangpa lei nin lân chu, kholaidunga nang ki hmu khomin nang tum ngai ki ta, tûte’n nin zakpui no nihai.

² Ka nu ina nang hruai ki ta, khataka khan lungkhamna chu ni’rchûtir ni ta; uain mirimhoitak nan intir ki ta, ki dalim tuia uain tui chu.

³ A vei kut chu ki lu hnuaia a hong siaa, a chang kut leh a nin kuaa.

⁴ O nangni Jerusalem nâinuhai, nangni ki ngên a ni, Lungthungna kha kaithoia inhartir loi hrangin, ama khan a nuam mâka chu.

Hla kirukna Dôngmatehai

⁵ Ramchâr rengata lungdi irhnêlmata hong so tu mo a ini? Apple theikung hnuaia khan nang ki kai thoia, ni’rzirna hmun ngeia khan.

Dôngmate

⁶ Ni milung sûnga irsinsiana angin le ni bân chunga khan irsinsiana angin ni siain lân; lungkhamna chu thina ang dôra a ihrât a ni; a hnarsânahai kha thina angin a nun a siaa, meichok angin a kânga, meidôn hrât takhai ang a ni.

⁷ Tui tamtakin lungkhamna chu inboi thei no nia, tuilian khomin tânpai thei no ni; Mi’n a irchon murdi leh lungkhamna chu irchôk a tumin chu, hmâimôkna ti no chu ite a dang hmu no ni.

Dôngmate nuchahaiin

⁸ Farnu chînte kin neia, a’rhnuhai khom la fuan maka, ei farnu ta hrangin imo ei itho hrang? Mi an honga, ama lua hrang tia an hong biak tena te.

⁹ Ama hi kul lei ni sianlân te, sumtak le in irsângin lei sin ei ta, Khan ama hi inkhâr lei ni ta khomsian, Sidar thing phêkhai leh siam ei ta.

Dôngmate

¹⁰ Kei chu kul anga om ki nia, ki’rhnuhai khom hi in irsânghai ang an ni; Ki lungdi’n an hriata, kei chu ama lungchuktak le lungthi takin ki om ti an hriat.

Ruatharte

¹¹ Solomona’n Baal Hamon hmuna grep irhuan a neia; grep irhuan kha a enkolpu kuang a man omin an enkoltirhaia, a enpuhai kha tangka sângkhat a pêkhai ngaia.

¹² Solomona, tangka sângkhat chu lâkin tangka irzahni chu grep hong pêltuhai ni pêk kîr nôk thei; Khannisian keima chu ki grep irhuan chu ki bingin donsui ki ti.

¹³ O ki lungdi, irhuan ata kha ni hnuk irhâi ni’rngaitir ro, ki rualhaiin ni hnuk irhâi irngai hrangin nang an nghâk.

Dôngmate

¹⁴ O ki lungdi, irhnot ro; sakhipui mani, Sazuktuai angin mani om ro; mirimhoi tânghai chunga khan.