HLAHAI HLA 7 - PATHIAN LEKHABU IRTHIANG C.L. Bible (BSI)

Ruatharte

¹ O rêng nâinu, ni ke chu ni sendel leh khan a’rhme bâka, kuttheithiam takhai isin angin, ni teêlhai chu lunghlu ang a nia.

² Ni milâi irbu chu, khuri uain tui irsam loi ang a ni, ni phîng chu lili pârhai laia bumût ang a ni.

³ Ni’rhnuhai chu sakhite inhni, sakhipuiin te inphîr an ineihai ang a ni.

⁴ Ni ring chu sâiha irsâng ang a nia. Ni mithai chu Bath-rabbim dâi mikot kôla Hesbon dîlhai ang a ni. Ni hnâr chu Lebanon in irsâng, Damaska tianga ngha ang chu a ni.

⁵ Ni lu chu Karmel tâng angin a’rsânga, ni lua samhai chu patzâi irhmi ang a ni; ni sam tâk bon bona om hi rêngin a hmu’n chu tuang zoi ngai mah.

⁶ O lungdi, raifân ni omin, ni hmêl khom a saa, milung nin tâitir hen hi te na!

⁷ Ni dung khom tûm thing angin a’rsânga, ni’rhnuhai chu grep ra bôr angin a’rbôra.

⁸ Kha tûm thing kha luiin, a rahai irhmal ki nuama, keima ta hrangin chu ni’rhnuhai kha grep ra irbôr ang a nia, ni mirim khom apple thei mirimhai ang a ni.

Dôngmate

⁹ Ni bâi chu uain satak ang a ni. Khaang kha a lei nia ni’n chu, Uain kha ki lungdi kuang luang sianlân, a hmûr le a kehaia va luang pe ri se.

¹⁰ Ki lungdi chu ki ta a nia, keima hi a irngai tak chu ki ni.

¹¹ O ki lungdi, hongin lân, so rama son va fe ei ti, thingtâng khuahaia lei riak rei.

¹² Zînga thoiin grep irhuana son va chai ei ta, grep rânghai so a pâr ta mo ti le dalim kunghai pârvângin mo an fîm ta tihai va en ei ti; Khataka khan ki lung nang inkham dân hi nang pe ki ti.

¹³ Zôlaidi’n mirimhai chu an suaa, thei sa chi tinrênghai chu ei mikot kôla hin an oma, O ki lungdi, nangma ta hrangin a milui le a thar an rêngin ki sia ving.