HLAHAI HLA 4 - PATHIAN LEKHABU IRTHIANG C.L. Bible (BSI)

Ruatharte

¹ O, ki lungdi, ni hmêl satzia hi chu o! ni puan lukhum hnuaia ni mit menghai hi lungkhamna an lang dânhai hi! ni sam chu Gilead tâng panga kêl rual lênghai ang chu a ni.

² Ni hahai khom belrapu mul ep zoia tuiirsila hong suak ang a ni, a bo bopin an hong suak vinga inkhat lua a binga om zel om mahai.

³ Ni hnerhai chu samkhit hrui senhai angin an langa, ni chong zoro khomin en a ihoi dân hi chu o! Ni biangbokhai chu ni puan lukhum hnuaia a chok nor nor ngai.

⁴ Ni ring khom Davida in irsâng angin irsâng kôkin a oma, kha in irsâng kha sipai hrât takhai sângkhathai leh a bang kha irvôtir a nia.

⁵ Ni’rhnu inhnihai khom sakhite inphîr ang a nia, lili pâr bila fâk zong ang a ni.

⁶ Zîng khorthi dâi a hong thoa, zân inthim a hong vâr mâka chu, mura le bero tâng chunga om mai ki ti.

⁷ Ki lungdi ni savinga, ite zel hi demna hrang zel om mak che.

⁸ O ki lungdi, Lebanon tâng ata kha ni zuiin lân, a ni, Lebanon tâng chung ata kha ni zui ro, A mâna tâng sîp ata zuang chumin lân, Kâmkeibaknei le keiârsihai omna Senir le Hermon tânghai ata zuang chum roh.

⁹ O lungdi le ki rualnu, ni mitsîr leh ni ni ikâp le ni hner chokhai khan ki lungrîl chu ni lâkpai ving ta.

¹⁰ O ki lungdi le ki rualnu, ni lungkhamna khan ki râi nin fântira, ni lungkhamna chu uain nêkin a thum uala, mirim dang tin nêkin a hoitak chu a ni.

¹¹ O ki lungdi, ni hnerhai khan khuaihnîng om ang dôrin, ni milei chu keima ta hrangin dûttui le khuaihlutui ang a nia, ni sil le kaihaia khom Lebanon mirimhoi dôr chu a om.

¹² O ki lungdi le ki rualnu, nang chu irhuan sûnga irkhum ang ni nia, Irhuan sûnga tuihnâr le irhuan sûnga tuirîlpût suak ang chu ni ni.

¹³ Kha hmuna khan theikunghai a mônga, Irhuana dalim kunghai anga omin, ra satak neia ra suakin, Hena le Spiknard thingkunghai leh.

¹⁴ Spiknard le pâr mirimhoi dipar le thingzungthum thing mirimhoi tinrêng le; mura le Aloe rimhoi chi tinrênghai leh.

¹⁵ Nang chu irhuana tuirîlpût, rungtui hring, Lebanon ivatedung luang suak chu ni ni.

Dôngmate

¹⁶ Tho’n lân, o hmâr tianga khorthi, nang sim tianga khorthi hong sa ro; Ki’rhuan hi hong sêmin lân, a mirimhoihai a vuang indarh ual theina hrangin. Ki lungdi chu hong sianlân, irhuana thei tinrêng rahai hi hong fa ri se.