HEBRAI toc2 HEBRAI 9 - PATHIAN LEKHABU IRTHIANG C.L. Bible (BSI)

Irnêng le irvân chubai mûkna

¹ Khan, thuthung masa khom khan chubai mûkna dânhai le mihriam siam chubai mûkna hmun a neia.

² Biakbuk an siama, chontan masa kha meiser an siana hai, maichâma baihai Pathian kuanga inhlan tâkhai a oma, kha kha Hmun Irthiang an tia.

³ Puanzâr inhnina sûnga khan biakbuk Hmun Irthiang tak an iti chu a ni.

⁴ A sûnga khan mirimhoi hâlna hmun rângachak maichâm le rângachak inluan Thuthung Bôm a oma; kha Thuthung Bôm sûnga khan mana omna rângachak kola hai, Arona khianghrol hong incher hai le thupêk irziakna lungphêk inhnihai kha an oma.

⁵ Kha Bôm sûnga khan Pathian roiinpuina inlangin Cheruphai kha sual ngaidamna hmuna an mitha pharin an om sa. Khannisianlân, atûn chu kha thurchi kha a kip a kôiin insîr thei ni no ih.

⁶ Kha thilhai kha hiang hin an lei irfûktir a ni. Ochaihai kha a nitin Biakbuk chontan masaa khan an sintum sin hrangin an fe ngaia.

⁷ Khannisianlân, Biakbuk sûngrila khan chu Ochai Inlaltak vai a kuma voikhat thisen chôi ngêtin a lût ngai. Kha a thisen chôi kha ama hrang sik le mipuihaiin an inhriat loi kâra sual an isinhai hrang sika khan Pathian kuang an hong inhlan ngai.

⁸ Hi irfûktirna murdia irthoka hin Irtha Irthiangin ar chutira; “Biakbuk chontan masa kha a la om sûng ka chu, Hmun Irthiang Tak lampui kha la’rhong mah,” ti hi.

⁹ Kha kha atûnlaia entîrna a ni. A omzia chu thilpêkhai le irbôlhai Pathian kuang inhlan khan, a bêtu lungrîl famirkip thei mah,

¹⁰ fâk hrang, i-in hrang le irthârna balam tamtakhai thu vai a ni sikin. Khahai murdi kha pên tiang dân ringot an nia, Pathianin thupêk thar a pêk mâka hmang hrang a ni.

¹¹ Khannisianlân, Krista chu thil sa, hitaka lei om pial tâkhai ochai Inlal takin a izuang a ni. Biakbuk, sin a thôna ngai kha a roiinpui uala, a famirkip ual; mihriam isin biakbuk ni mah, ama kha hi rammuala thilsiam laia mi ni mah tihna a ni.

¹² Krista’n biakbuk chontan masa khêla Hmun Irthiang tak voikhatin a lût pat lai khan, irbôlna hrangin kêlhai le sehrâthai thisen chôi maka, ama thisen ngei chôiin ei ta hrangin kumtuang saninhringna a ni irhmu tâk a ni.

¹³ Kêlhai le sehrâtchalhai thisen le se’rla irvâm porinche chunga a inthek luan an taksa innimna infâi pêkin an irthiang theiin te,

¹⁴ Krista thisen len vângin te a ithei ual ok hrang kêng! kumtuang Irtha hruaina’n Pathian kuang ama irbôlna famirkip ar hlan tâk sikin, Pathian hring sin ei tho theina hrangin a thisenin thina ten intung sintho ngaihaia irthokin ei sia le sa inhriatna irthiang a ti.

¹⁵ Hi sika hin Krista hi thuthung thar irfûktirtu a ni, Pathianin a ikoihai khan kumtuang satvurna a inkung kha an hmu theina hrangin. Kha a ni theina chu thuthung masa a la om sûnga mihriamhai inchâina irthoka kêlsuaka, thina a lei om tâk sikin a ni.

¹⁶ Pi le pu thumâk chungchânga chu a mâktu kha a thi le thiloi ir-enfia a nang,

¹⁷ a mâktu a la dam sûng chu ite a hmangna la om loiin a thi hnungin kêng a hmangna a la om chak ngai a ni.

¹⁸ Khasikin thuthung masa khom kha thisen an hmang tena kêng hmang a la ichang.

¹⁹ A masa’n Mosia Dâna thupêk murdihai kha mipuihai kuang an puang baka. Kha hnung chu sehrâtchalhai le kêlhai thisen kha tui leh irpoltirin, husop ôn le samul sen hmangin Dân lekhabu le mipuihai murdi kha an theka,

²⁰ an kuang, “Hitak hin Pathianin nin izôm hranga nangni a ipêk thuthung namindettu thisen kha a ni,” a tia.

²¹ Khabana, Biakbuk le biakna hmangruahai murdi khom kha thisen an thek sa.

²² A dik takin, Dân dungzuiin thil tinrêng hi thisenin an irthiang thei zit dên, sualhai ngaidamna vai kêng thisen suak loia a chang thei loi.

Sual chu Krista irbôlna’n an boi

²³ Kha thilhai, irvâna a tak taka om millimhai kha, khaang khan irthiangtir an ini hrang a ni. Khannisianlân, irvâna thilhai kha chu irbôlna sa ual ok an innang a ni.

²⁴ Krista chu mihriam isiam Hmun Irthiang, a tak millima khan lût mah, atûna Pathian makunga ei irthûla a ngîrna irvâna khin a ilût zôi a ni.

²⁵ Juda Ochai Inlaltak khan sa thisen chôiin Hmun Irthiang Taka khan kum tin a fe ngaia. Khannisianlân, Krista chu nangnia inhlan hrangin voi tamtak lût mah.

²⁶ Khaang khan ni no sianlân, irnêng irsiang phut ata voi tamtak a ituang hrang tâk a ni. Khannisianlân, atûn zoro mong hrang tôna hin ar bôlna sika sual an boi theina hrangin voikhatin a zuang inlang a ni.

²⁷ Mi tin voikhat chu thi ngêt an ta, kha hnunga khan Pathian irêlin om an ti.

²⁸ Khaang dênin Krista khom kha mi tamtakhai sual inboi hrangin voikhat irbôlna’n inhlan a ni tâka. Sualhai lapai hrang ni ta loiin ama lei nghâktuhai saninhringnaa hruai lût hrangin a izuang nôk hrang a ni.