HEBRAI toc2 HEBRAI 7 - PATHIAN LEKHABU IRTHIANG C.L. Bible (BSI)

Ochai Melkisedeka

¹ Hi Melkisedeka hi Salem rêng le Pathian Inchungtak ochai a ni. Abrahama rêng minlihai inhnê zoia râl buala irthoka a hong tiang Melkisedeka hin a’rtongpuia, sat a ivur a ni.

² Khanchu, Abrahama’n thil tinrêng sôma inkhat a pêk ta. (Melkisedeka irhming omzia masa chu “Felna Reng” a nia, khabana Salem rêng a ni sikin “Irngeina Reng” a ni sa.)

³ Melkisedeka pa mani, nu mani, ar chibulhai mani, irziak zel om maka; a suak ni le a thi ni khom irziak om sa ma. Pathian Nâipa angin ochaiin a iom mai a ni.

⁴ Irngai u ta, idôra roiinpui mo a ini; Ei irchibul Abrahama luan a râlhai thil tinrêng sôma inkhat a ipêk kha.

⁵ Levia irchihai laia ochai changhai kha, Israelhai kuanga irthoka sôma inkhat la hrangin Dânin thu a ipêk a ni; ama kha an ram mihai kuanga irthoka a ni, an ram mihai kha Abrahama irchi ngêt nihai khomsian an itho a ni.

⁶ Melkisedeka kha Levia irchi ni mah, khannisianlân, Abrahama kuanga irthokin sôma inkhat a lâka, Pathian chonginkung hmutu kha sat a ivur a ni.

⁷ Lunghlâna om viat loiin, satvurna dongtu nêkin a vurtu a roiinpui ual.

⁸ Ochaihai chungchânga chu a thi thei mihriamhaiin sôma inkhat an lâka, khannisian, Melkisedeka chungchânga chu, Pathian Thubu’n a hring mai a ititu’n sôma inkhat a ilâk a ni.

⁹ Khan, Abrahama’n sôma inkhat a pêka khan, Levia sôma inkhat la ngaitu khomin a pêk sa ti thei a ni.

¹⁰ Melkisedeka’n Abrahama a’rtongpui laia khan Levia kha la suak maka, ar chibul Abrahama takpum irzoma a la om mai sikin.

¹¹ Israelhai kuanga khan Levihai ochai nina hnuaia Dân ipêk an ni. Khahai sintho kha a sa irkip a ni’n te, Arona anga ni loiin Melkisedeka anga ochai dang hong om ite a nangna om mah.

¹² Ochai ninaa khan danglamna a hong omin chu dâna khom danglamna a hong om ngêt a inang a ni.

¹³ A thuhai insîra om ei Rengpa chu nam dang a nia, a nam laia mi tûte ochai chang ngai mah.

¹⁴ Ei Rengpa chu Juda nama irthoka zuang irzir a nih ti inhriat infel a ni, Mosia’n ochai chungchâng thu an sîr laia khan hi nam hi sâm mah.

Melkisedeka anga ochai dang

¹⁵ Ei thu’nsîr kha a hong fel ual ta; Melkisedeka anga ochai dang a hong om ta.

¹⁶ Ama kha mihriam dân balama siam ni loiin, mong ngailoi hringna sinthotheinaa ochaia siam a ni.

¹⁷ Pathian Thubu’n, “Nang chu, Melkisedeka omdân anga kumtuangin Ochai ni ni ti,” a iti ang khan.

¹⁸ Balam milui kha a hrât no sik le a hmangna boi sikin pai a ni ta.

¹⁹ Mosia Dân khan ite satirkipin a siam thei no sikin. Atûn chu tûngna sa ual pêkin ei om tâka, Pathian ei nâi thei ta.

²⁰ Khabana, Pathian khomâk irsâmna khom a om sa ta. Mi danghai ochai chang laia khan chu, khaanga khomâk irsâmna kha om ngai mah.

²¹ Khannisianlân, Jisua chu Pathianin a kuang, “Rengpa kha khomâk ar sâmna, A milung inchong thûl ta no ni: Nangma kumtuangin Ochai ni ni ti,” tia khomâk irsâmin ochaiin a isiam a ni.

²² Khasikin kha danglamna khan Jisua chu thuthung sa ual inkungtu’n a isiam tâk a ni.

²³ Danglamna dang a la om sa: mi danghai kha chu thina sikin an om mai thei ngai no sikin, ochaia siam kha tamtak an ni.

²⁴ Khannisianlân, Jisua chu Kumkhontuangin a hring mai sikin a ochai sin kha tûte’n thûl mahai.

²⁵ Khasikin amaa Pathian kuanga honghai chu atûn le itiklai khomin a saninhring thei, anni ta hranga Pathian kuang ngên pe hrangin kumtuangin an hring mai sikin.

²⁶ Khaang khan, Jisua Ochai Inlaltak mi’rthiang, demnaboi, sualna neiloi, mi sualhai laia irthoka a binga om, irvânhai nêka inchung uala siam tâk chu ei ta hrangin a iruk bak a ni.

²⁷ Ama kha ochai inlal danghai angin ni maka; ochai inlal danghai chu a nitin an sualna sikin irbôlna an inhlan baka, kha hnung kêng mihai hrang an la inhlan pe ngai. Khannisianlân, Jisua chu ama ta hrangin nang mah sikin, voikhatin ama ar hlan laia khan irbôlna inkhatin a irzoitir zit a ni.

²⁸ Mosia Dân khan mihriam, irsamna neihai kha ochai inlaltakin a phun ngaia, khannisianlân, Pathian khomâk sâmna chonginkung, Dân hnunga zuang om khan chu Nâipa, kumtuanga irkip tak kha a iphun a ni.