HEBRAI toc2 HEBRAI 6 - PATHIAN LEKHABU IRTHIANG C.L. Bible (BSI)

¹ Tho, khasikin Krista thu bul insîr ta loiin, maton tiang fe’n puihling lam pan ta ei ti. Sin chanlamboi thina intung ngai ata irleta Pathian iam hrang lam hai,

² baptisma le kut irnghatna chungchânga irchutirna thu hai, thoinôkna thuhai le kumtuang roirêlna thuhai lungphûm chu phûm nôk ta no ih.

³ Maton tiang fe ta ei ti! Pathianin sa a tiin chu kha kha ei itho ngêt hrang a ni.

⁴ Khan, voikhat chu Pathian vâra om tâka, irvân thilpêk irtem tâka, Irtha Irthiang khom dong tâka,

⁵ Pathian thu satzia le zoro la hong hranga sinthotheina om hrang hai khom inhriat tâka,

⁶ an iamna mâk nôkhai chu irlet nôk hranga hong kîr nôk thei zât ni ta mah. Anni khan Pathian Nâipa kha hembe nôkin mualphoi an sak sikin.

⁷ Irnêng, a chunga rotui tâk ngai lei donga, a neitu ta hranga chîmu fâk rua insuak tâk chu Pathianin sat a vur ngai.

⁸ Khannisianlân, kha irnêng khan ilhling le hloi an suaktirin chu chanlamboi a nia; Pathian khomâksâm ichiomin a oma, inhnunga chu hâl irhmang a ni ngai.

⁹ Khannisianlân, rual lungthunghai, khaang khan ti khom inlân, nangni chu satvurna sa kin inhriat infel.

¹⁰ Pathian chu felloi ni mah. Ama ta hranga sin nin ithohai, lungthungna nin inlanghai, nin Kristian chanpuihai nin lei ichangpui le atûn ten khom nin la ichangpui maihai kha irnghil viat no ni.

¹¹ Nin itûng a hong tung indik theina hrangin nin sika nin takirtâina chit insua mai hrangin kin inuam tak tak a ni.

¹² Nin irtha inboi loiin iamna le tuangdiarna sika Pathian inkung hmuhai om dân kha irchu hrangin nangni kin inuam sa a ni.

Pathian chonginkung iamom

¹³ Pathianin Abrahama kuang chong an kung laia khan ama nêka roiinpui ual tûte an om no sikin, ama irhming sâmin khomâk ar sâma.

¹⁴ Pathianin Abrahama kuang, “Sat nang vur ki ta, irchi tamtak nang pe ki ti,” a tia.

¹⁵ Abrahama’n a tuangdiar sikin Pathian inkung kha a ihmu a ni.

¹⁶ Mihriamhaiin khomâk an irsâmin, anni nêka roiinpui ualhai irhming sâmin an irsâma, an irkhalna tinrêng khom an mong ngai.

¹⁷ Pathianin a inkung hmu hranghai kuang khan a thil tum indanglam viat no ni, ti infel pe ual nuamin a chonginkung kha khomâk irsâmin a indet a ni.

¹⁸ Khasikin Pathianin thil inhni a chonginkung danglam loi hrang le khomâksâm irkhêl loi hrang hmangin eini a kuanga zôkna hmuhai hin ei matona tûngna om hi intûk indet ngit hrangin a nin thor tak tak a ni.

¹⁹ Kha tûngna kha ei hringnun hrangin thîrkuaikim ang kha a ni. Det tak le iamom tak a nia, irvân biak in puanzâr sûnga hmun irthiang khoma khan a lûta.

²⁰ Ama khan Jisua’n ei irthûlin ei matona a lei lût tâka, Melkisedeka angin kumtuang ochai inlaltak a lei ni ta.