HEBRAI toc2 HEBRAI 5 - PATHIAN LEKHABU IRTHIANG C.L. Bible (BSI)

¹ Ochai Inlaltak murdi’n chu, sualhai sika irbôlna le thilpêkhai inhlana mihriamhai irthûla Pathian sintho hranga mihriamhai laia irthoka phun an ni.

² Khahai khom kha lam tamtak ata an hrât nona sikin, ite inhre loihai le an sualhai chunga khan an indîn thei ngai.

³ Khasikin mi danghai ta hrangin sual irbôlna an inhlan ang khan an mâni ta hrang khomin an inhlan ngêt hrang a ni.

⁴ Chôiindômna dong nuamin tûte Ochai inlaltak chang thei ngai mah. Arona anga Pathian ikoihai vai kêng ochai inlaltak a ichang thei ngai.

⁵ Khaang khan, Krista khomin ochai inlaltak ni sika chôiindômna kha ama ta hrangin la mah. Khannisianlân, Pathianin a kuang, “Nangma ki Nâipa ni ni, a vuan sûn hin ni Pa ki hong ni tâk,”

⁶ Hmun danga, “Melkisedeka angin nangma Kumtuangin ochai ni ni ti,” a ti sa.

⁷ A taksa irput lai sûnhaia khan Jisua’n thina irthoka ama saninhring theitu Pathian kuang a sâna inringa khêkin le ngênna hai a neia, irngaiintôma ar pêkna sikin irngai pe’n a om.

⁸ Pathian Nâipa tak ni khom sianlân, a tuangnahaia khan thu zôm a irchu a ni.

⁹ Irkiptir a hong ni tena chu a thu zômhai ta hranga saninhringna hnâr a hong ni ta.

¹⁰ Khaang khan, Pathianin Melkisedeka anga kumtuanga ochai inlaltak ni hrangin an kung ta.

Tûkna ata irdîn hrang

¹¹ Hi thua hin insîr hrang tamtak ei nei, khannisianlân, an sîr infel an tak, nin inhriat thei no sikin.

¹² A zoro ngaitua’n chu irchutirtu ni thei ta zit le nin irhoia, khannisianlân, Pathian thu bul rêt A, B, CH ata irchutir nin nang nôk tâk a ni. Bu’nhrum ni loiin irhnutui lan nang kêng nin ini.

¹³ Tukhom irhnutui lan nang chu, sia le sa lan hriat loi, nâite a ni.

¹⁴ Bu’nhrum chu ulianhai, an tho inzong sika a sa le a sia sen thei tâkhai hrang a ni.