HEBRAI toc2 HEBRAI 13 - PATHIAN LEKHABU IRTHIANG C.L. Bible (BSI)

Pathian inlômtir hrang lam

¹ Kristian urênghai ang takin lung irthung irhlôm roi.

² Nin ina mikhual intung inhre mai roi. Mi senkhatin khaanga tho an inhriat no kârin vântîrtôn an intung tâk kêng.

³ Lung ina omhai kha, nangni khom a intâng sa ang takin inhre mai roi.

⁴ Inneina hi mi murdi’n an inhlut hrang a ni, ompui sangram khomin an iamom irhlôm hrang a ni. Irdithai le uirehai chu Pathianin rêl a ti.

⁵ Sum irngaiinnat mi ni no unglân, nin thil nei lam anga khan milung inchuk roi. Pathianin, “Nang intha viat no ninga, mâk khom nang ma viat no ning,” a ti sikin.

⁶ Khasikin hâi takin, “Rengpa ni changpuipu a ni, chi no ning. Mihriamin imo a ni ilo thei hrang?” ti ei ti.

⁷ Pathian thu nangni lei insîr pe nin hruaitu masahai kha inhre mai roi. An lei hong om dân le an thi ziahai kha ngaitua unglân, an iam dân irchu roi.

⁸ Jisua Krista chu mizân, a vuan le kumkhua’n a pangai dên a ni.

⁹ Irchutirna chi dang dang le irkhêl tak tak hruai irhmangin om no unglân, Pathian lungkhamna irthoka lungrîl hrâtna hmu hi a sa, fâk thua dân zômin chu ni no ri se; kha dân zômhai khan ite irfêna hmu mahai.

¹⁰ Biakbuka ochai angin sin ei thoa, maichâma khan chu fa thei mak meh.

¹¹ Nin inhriat angin, saruak, a thisen Juda ochai Inlalin Hmun Irthiang Taka irbôlna hranga a ilûtpui ngai kha riakbuk pên tiang an ihâl ngai a ni.

¹² Jisua khomin ama thisen ngeia mihai an fâi theina hrangin khopui pên tiang a lei ituang a ni.

¹³ Tho, khasikin khopui pên tiang fe ei ta a mualinphoina lei irkoppui rei.

¹⁴ Irnênga hin chu khopui det nei mak mea, khopui la hong om hrang kha ei isabei a ni.

¹⁵ Khaang khan, Jisua zâra ei irbôlna’n Pathian kuang inpâkna inhlan mai ei ti; ama kha hmûrin irbôlna an inhlan, “Rengpa a ni,” tia an ithopna a ni.

¹⁶ Thil sa sin le irsan irhlôm hi irnghil no roi, khahai kha irbôlna, Pathian inlôm ngai an ni.

¹⁷ Nin hruaituhai thu zôm unglân, an thupêk murdi zui roi. Pathian kuang an sintho an lan sîr hrang sikin irngam loiin nangni an enkol ngai a ni. An thu nin zômin chu, raifân takin sin an ti, khano’nchu, intak pumin sin an ta, nin ta hrangin sa no ni.

¹⁸ Kin ta hrangin ni chongchai pe mai roi. Itiklai khomin thil fel sin ki nuam mai sikin sia le sa inhriatna irthiang tak kin nei ti kin inhriat infel.

¹⁹ Nin kuang Pathianin a ni tîr nôk zôi theina hranga chongchai hrangin nangni ki ngên tak tak a ni.

^20-21 Khan, ei Rengpa Jisua, a thina sika kumtuang thuthung deta om, Belrapu Roiinpuitak, thina irthoka a kaithoitu irngeina Pathian khan a lungdo nin sin theina hrangin thil sa nin innang murdi nangni pe sianlân, Jisua Krista zâra einia hin, ama a lungdo sin ri se. Krista kuang roiinpuina kumtuangin om mai ri se! Amen.

Thukhârna le chongchaina

²² Urênghai, nin kuanga ki lekha thon hi a sei ok no sikin hi inthorna chong bêhai hi ngûk taka irngai hrangin nangni ki ngên.

²³ Ei urêngpa Timothea intângna in ata insua a ni tâk ti nin inhriat ki nuam. A hong tung inrangin chu, nangni hmu hrangin ki hong tena hong hruai ki ti.

²⁴ Nin hruaituhai murdi le Pathian mihai murdi kha chubai ni mûk pe roi. Itali rama urênghaiin chubai nangni an mûk.

²⁵ Nin rênga kuang Pathian lungkhamna om ri se.