HAGAIA 1 - PATHIAN LEKHABU IRTHIANG C.L. Bible (BSI)

Tempil inding thar nôk hranga Rengpa thupêk

¹ Rêng Daria inlal kum hnina, a tha rukna, kha tha nikho masa taka khan, deipu Hagaia kuanga Rengpa thu kha, Sealtiela nâipa Judai ramoptu Zerubabela kuang le Jehozadaka nâipa ochai intaltak Josua kuang a zuang tunga, hiang hin a ti.

² Sipaihai Rengpa khan hiang hin a ti, “Hi mihai hin, Rengpa in sin hrang zoro chu la hong tung ma, an ti e,” tiin.

³ Khan, deipu Hagaia kuang Rengpa thu a zuang tunga;

⁴ “Hi in hi a ram chian laia nangni in chung irchuan neia lêng hi a zoro ma ni? tiin.

⁵ Atûn chu sipaihai Rengpa khan hiang hin a ti: Nin lampuihai ngûk takin sût infel roi.

⁶ Tamtak nin songa, tômte nin inlût ngaia; nin fâka, khop ual mak chêi; nin ina, khop mak chêi; nin sila, lum ual hliak mak chêi; irhlo fâk khan zêp cheta tha hrang piala a ihlo a ni.

⁷ Sipaihai Rengpa khan hiang hin a ti: Nin lampuihai kha ngûk takin sût roi.

⁸ Tânga hong kâi unglân, thing hong la unglân, in kha sin roi; kha khan lôm ki ti, chôiindômin om ki ti, Rengpa’n a ti.

⁹ Hmu nghek nin sabeia, irngai u ta, tômte a lei ni; ina nin hong tunga, ki lei sêm irhmangpaia. Itho sika mo? ti hi Sipaihai Rengpa thu suak a ni. Nangni mâni in tiang pan senga nin intân lat ngaia, ki in kha chu a ram chian sika a ni.

¹⁰ Khasikin irvânin irdorfîm tâk hrang nangni a khappai pea, irnêngin a ra nangni a khappai pe sa a ni.

¹¹ Irnêng chunghaia, tâng chunghaia, bu chunghaia, uain chunghaia, hriak chunghaia, irnêng chunga thil hong suak chunghaia, mihriam chung haia, sa chung haia, kuta tho suak murdihai chunga khua kin kangtir a ni,” a tia.

Mipuihaiin Rengpa thupêk an zôm

¹² Khanchu Sealtiela nâipa Zerubabela le Jehozadaka nâipa ochai inlal tak Josua le mi la omsun murdihai khan Rengpa an Pathian irhâi le Rengpa an Pathianin a itîr anga hong, deipu Hagaia thu kha an irngai tâka; mihai khan Rengpa kha an chi tâka.

¹³ Khanchu, mihai kuang Rengpa chongbe hmang khan Rengpa tîrtôn Hagaia khan an sîra, Nin kuang ki iom a nih, ti hi Rengpa thu suak a ni, tiin.

¹⁴ Khan, Rengpa khan Sealtiela nâipa, Judai ram optu Zerubabela lungrîl le Jehozadaka nâipa, Ochai inlaltak Josua lungrîl le mi la omsun murdihai lungrîl kha a kai har tâka; khanchu an honga, Sipaihai Rengpa an Pathian ina khan sin an tho tâka;

¹⁵ rêng Daria inlal kum hnina, a tha rukna, kha tha sûn sômhni le sûn minlinaa khan.