HABAKUKA 3 - PATHIAN LEKHABU IRTHIANG C.L. Bible (BSI)

Habakuka chongchaina

¹ Sigion chunga deipu Habakuka chongchaina.

² O Rengpa, ni chong kin hriata ki chi tâka, O Rengpa, hi kum sûng hin ni sin tho inthar nôkin lân, Hi kum sûnghai hin inlârtir nôkin lân, Ninginmurnaa khan za’rngaina kha inhre mai roh.

³ Temana ram ata Pathian a honga, Mi Irthiang kha Paran tâng ata, A roiinpuina’n irvânhai khi a tuama, An pâknain irnêng hi a isip a ni.

⁴ A’rtêkzia kha vâr ang dên a nia; A kut ata vâr irtêk a hong suaka, Ama khan a sinthotheina irthupin a om.

⁵ A matona khan hripui kha a fea; A kehaia irthokin mei ir-al irling a fe suaka.

⁶ A ngîra, irnêng kha an hnînga, Namhai kha a ena, an hnot indara; Kumkhua tânghai khom kha indartirin an oma, Kumtuang mualhai kha an kûn saa; A lampuihai kha kumtuanga hrang a ni.

⁷ Kusan puan inhai dengthei tuang lai ki hmua; Midian ram puanzârhai kha an thinga.

⁸ Rengpa chu ivadunghai chunga khan a milung a inchukloi ma ni? Vadunghai chunga khan ni ninginmurna kha a omin, Tuikhanglian chunga khan ni ninginmurna kha a iom ma ni? Ni sakorhai chunga khan chuangin, Ni saninhringna sakor tâlihaia khan ni ichuang hi?

⁹ Ni thalngul kha inrongpai zit a nia; Thalhai kha a hruia nin khopa. Khomâksâmna kha namhai hrangin a deta, Nang chu irnêng kha ivadung nin changtir tâka.

¹⁰ Tânghai khan nang an hmua, an chia; Tui irsokhai khom kha an fe irhmang tâka; Li inthûk khan hnukirhai an suaa, A kuthai kha chung tiang a phara.

¹¹ Misa le tha chu an omnaa khan an ngîr maia, Ni thalhai kâp suaka om ivâr le, Ni ufei irtêk zor zor vâra khan.

¹² Ninginmurin ram kha nir fang suaka, Ninginmurin namhai ni chîlchita.

¹³ Ni mihai saninhring hrangin ni fe suaka, Ni sahriak pol saninhringna hrang khan. Mi sia sûngkuaa irthok khan lu kha nin phopa, ring dênin a lungphûm kha nin langtir tâk a ni.

¹⁴ Inrûka inriang fâk irhmanga nuama lômtuhai, kêllaiher anga hong pûtin, nin darhtir hrangin an honga, Irdoi theihai lu kha ni khianghrolin ni sun tâka.

¹⁵ Ni sakorhai leh khan tuipui nin hroa, Tui irsok irkhêl tak kha.

¹⁶ Kin hriatin ki sûngrîl kha an thinga, Ki hmûrhai kha hnukirhai khan an thing nor nora; ki ruhaia khan hmonna a hong lûta, Kha ki omna hmuna khan ki inthing a ni; Buaina nia khan irngam ki ta, Mipui, sipai pâl anga ni rûntu chunga a hong tung tika chu.

¹⁷ Theipui kung kha pâr ta no khom sian, Grephruia khan a ra om ta no ngân khomsian; Oliv sika sin sôlna kha mâkana hong niin, Loihai khan bu hong vâng ta no khom sian; Belra pâl kha a ina irthoka sâtthâka omin, Sehrât ina khan sehrât pâl khom om ta nohai khomsian,

¹⁸ Rengpaa khan raiinfân ki ta, ki saninhringna Pathiana khan lôm ki ti.

¹⁹ Rengpa, Jehova kha ki hrâtna a nia, ki kehai chu sazukpui kehai angin a siama, Ama khan ki hmun irsânga nin fetir a ti.