HABAKUKA 2 - PATHIAN LEKHABU IRTHIANG C.L. Bible (BSI)

Habakuka kuanga Rengpa sâmna

¹ Khan, ki’rdîpnaa ngîr ki ta, kul chunga chuang ki ta, ki sêlna thua khan ki kuang imo a iti hranga, Keiin mo ki isâm hrang ti hmu hrangin thîr ki ti.

² Khan, Rengpa khan hiang hin a ni sâma: “Inlârna kha irziakin lân, a teptu’n intân puma a tep thei dôra felin lung phêk chunga irziak roh.

³ Inlârna hi zoro inkung sûng hrang vai a ni lelea, A king nikhua anai tîr tîra, mâkana ni no ni. Sôt viat khomsian nghâk ro; A zuang tung ngêt hrang sikin inhnung ual no ni.

⁴ En ta, mi lârirpâk khan a sual sikin tuang a ta, Mi dik rêk chu a iamom sikin zôk a ti.

Mi dik loihai tuang hrang

⁵ A ni, kha ni loi khom kha, uain indu chu mi huang hmang, Mi lârirpâk, a ina om ngailoi mi a nia; Ama khan a’rzukna kha hremhmun angin an liantira, Ama kha thina ang a nia, inthâi thei zât ni mah. Mi murdihai a kuanga khan a bukkhômin, Nam murdihai kha a kuang a lâkkhôm ngai a ni.

⁶ Hihai murdi hin ama chunga êrôna thu, intêkna thuvâr tôi “A ta ni ual loia inpungtir chu i dôr ten mo a inei hrang? Mâni le mâni bânda insiattu chung chu a va rik e! an iti loi hrang ma ni?

⁷ Anni khan voikhat rengin nang hong insiattu hrang kha kaithoi an ta, Mân tiang hnung tiang nang nortu hrang kha hong kai harin, An ta hranga râllâk thil ni ini chian loi hrang ma ni?

⁸ Nam tamtak ni longhai tâk sikin, Nam danghai khomin nang long an ti. mihriam thisen le ram le khopui le a sûnga lênghai chunga, Mihriam thisen le irmanêpna thil lei tho tâk murdi sika khan, nang khom chia la omsunhai khan nang insiat sa an ti.

⁹ Mi sual kuta irthoka a zôk theina hrangin, a bu irsâng taka an sêp theina hrangin, a insûng ta hranga inlâpna dikloi lâktu chu a chung a rik e!

¹⁰ Mi tamtak chu sât thâkin, Ni in sûng ta hrangin inzakna nin tung tâka; Ni hringna chung ngeia khom thil ni itho’nsual tâk a ni.

¹¹ Banga irthokin lung kha hong khêksuak a ta, Thing laia pakhalâi khan a ihong don sa hrang a ni.

¹² Thisen insuaka khopui siam le, pualoinaa khopui indingtirtu chung chu a rik e!

¹³ En u ta, namhai kha tep loia mâni an irlungkhama, chi tinhai khan mei ta hranga sin an isôl hi, Sipaihai Rengpa ata a ini loi ma ni?

¹⁴ Tuikhanglian kha tuihaiin a isip angin, Rengpa roiinpuina inhriatna khan irnêng hi a isip hrang a ni.

¹⁵ A tualbômhai kuanga in hrang pêka, khataka khan a tûr kha pola a silkai boi kha a hmu theina hranga inruitirtu chung chu a rik e!

¹⁶ Roiinpuina hranga inzaknaa sip ni ni tâka, Nang khomin inin lân, silkai boiin om sa chian ro; Rengpa kut chang tiang khilât kha ni kuang zuang irlet a ta, Ni roiinpuina chunga porinche inzakna intirom kha om a ti.

¹⁷ Lebanon chunga irmanêpna le, Ramsahai chunga insiatna, anni inchitirna khan, Ram le khopui le a sûnga omhai chunga leh, Mihriamhai thisen le thil lei tho tâk murdi sika khan, Nang chu nang a ikhum hrang a ni.

¹⁸ Millim siam chop a siamtu’n a isin khan, imo inlâpna a inei hrang? Millim siam chop, milak irchutirtu ma mai a siamtu’n ama kut suak a iiam nôk hi, Millim chongtheiloi hong siam hi imo a’rfêna?

¹⁹ Thing kuanga khan, “Har roh,” tia lung chong theiloi kuang, “Thoi ro,” titu kha, A chung a rik e! Hi hin nangni a irchutir hrang ma ni? En ta, rângachak le tangkaruaa inluan a nia, A sûnga phûk zel om viat ma.

²⁰ Rengpa chu a in irthianga khan a oma; Irnênga mi murdihai kha a makunga khan dâihrek ri sehai.