GALATIA 4 - PATHIAN LEKHABU IRTHIANG C.L. Bible (BSI)

¹ Ki insîr tum tak kha hong insîr thiai inlân; Nâipa kha irchon murdi luatu hrang ni sian khom nâipang a la ni sûngin chu a neitu tak a ni khomin suak ang dêna ibe a ni.

² A pa zoro’nkung a tung mâka chu enkoltuhai hnuaia a om ngai.

³ Eini khom khaang khan ei om, nâipang ei la ni lai khan rammual irchutirna dikloi hnuaia suak ei ni.

⁴ A zoro tak a hong tungin chu Pathianin a Nâipa kha a zuang tîra.

⁵ Ama kha, Dân hnuaia omhai nir tan hrang le nâipa ngîrhmuna nin ngîrtir hrangin nupang ata suakin Dân hnuaia a hong inseiliantir a ni.

⁶ Nâi nin nih ti a felna hrangin, Pathian khan a Nâipa Irtha kha ei milung sûnga a hong tîra, “Abba, Ka pa” tiin a khêk suak ngai.

⁷ Khanchu, suak ni ta mak chêia, nâi nin ni ual ta, nâi nin niin chu, Pathian zâra irchon luatuhai hrang nin ni.

Galatia mihai Paula’n ar vei

⁸ Tianlai khan Pathian lan hre ngai mak chêia, khasikin an irzir dân reng khoma Pathian ni ngai loihai suaka nin om ngai kha.

⁹ Atûn chu Pathian nin hong inhriat tâka, Pathianin nangni a hong inhriat tah ti hrang a ni. Itho sikin mo rammual irchutirna dikloi mai maia, ite ni theiloihai tiang nin irheia an suak ni nôk nin inuam tâk?

¹⁰ Misa hai, tha hai, zoro hai, kum hai ser bîk nin inei nôk tâk?

¹¹ Nangni hrangin ki zoro chanlamboiin pai ki tih ti ichi a om a ni.

¹² Urênghaio, keima anga om hrangin nangni ki ngên, nangni ang dênin kei khom ki oma, tukhomin ki siatna hrang tho ngai mak chêi.

¹³ Nin kuang Thurchi Sa ki hong hril masa khan ki damno sika a nih ti nin inhriat.

¹⁴ Ki taksa kha nin ta hrangin buaipui om tak ni khom sian, ni hmusit mak chêia, ni hnôl ual mak chêi; Pathian vân vântîrtôn ang dên le Jisua Krista ang dênin nin ni lôma.

¹⁵ Thei ni len vâng sian nin mithai kêlsuaka ni pêk nin irhuam tih kin hriat; vânnei nin irti lia le te itho mani ta?

¹⁶ Thudik tak kin sîr sikin nin râl mo ki ini mani ta?

¹⁷ Ni irdoipuihai hin a sa lama nangni hong ngaisak ni mahaia, nangni hruaipaia, nin irngaiinhluthai an nuam sika kêng.

¹⁸ Nin laia ki om lai khomin a sa tianga hong ngaisak an om photin chu raifân a om mai.

¹⁹ Nâihaio, Krista angna nin nei mâka chu nâi irveiin nangni ki irvei a ni.

²⁰ Atûna hin nin kuanga ki iom ni sian ki’rzuk tak tak, nin tianga ki ngaituana khom indanglamtir ki ta; nangni ki ngaituana ki milung a buai ok tâk kêng a ni!

Hagari le Sari ennirkhîna

²¹ Dân hnuaia om nuamhaio, ni hril roi, Dân thu kha nin inhriat loi ma ni?

²² “Abrahama chu nâipa inhni a neia, inkhat kha suaknu nâi, inkhat kha a suak ni loinu nâi,” ti irziak a ni.

²³ Suaknu nâi kha mihriam dân pangai anga nei a nia, a suak ni loinu nâi chu Pathian thu’nkung sika nâi a ni.

²⁴ Hi hi chongirkhek a ni: kha nupang inhnihai kha thuthung inhni entîrna an ni, inkhat chu Sinai tâng ata hong suak kha a nia, kha kha Hagari a nia, a nâi neihai chu suak an ni.

²⁵ Hagari kha Arabia rama Sinai tâng entîrna a ni, Jerusalem chu atûnlaia khua leh hmunkhat a ni, a sûnga omhai leh suak an ni.

²⁶ Chung tiang Jerusalem chu suak ni mahai, kha kha eini nu hi a ni.

²⁷ Pathian Thubu’n, “Nang a ching tâk, nâi nei ngai loi, lôm roh! Nang nâiha irvei ngai loi, raifân takin khêk suak roh! Nupang pasal neinu nêkin chu nupang chardong om, mi imâknu khan nâi a nei intam ual a ti,” ti irziak ang khan.

²⁸ Khanchu urênghaio, Isaka ang dêna Pathian thu’nkung nâihai nin ni.

²⁹ Mihriam dân pangai anga nei khan Irtha sinthotheinaa nei chu deng a inthei ang dênin, atûn khom a ni mai.

³⁰ Lekha thua itin mo a irziak kha? “Suaknu chu a nâipa leh khan inhnot suak roh; suaknu nâipa khan suak ni loinu nâipa irchon a iluapui hrang ni mah,” ti a ni kha.

³¹ Khanchu, urênghaio, suaknu nâihai ni mak mea, suak ni loinu nâihai ei ni.