GALATIA 2 - PATHIAN LEKHABU IRTHIANG C.L. Bible (BSI)

Tîrtôn danghaiin Paula an pom

¹ Kum sômhlei minli zoiin Barnaba leh Jerusalema kin hong fe nôka, Tita khom kin hruai sa.

² Pathianin a ni tîr sika fe ki ni. Hruaitu lian ualhai vai an bingin ki’rhmupuihaia, Jentailhai kuang Thurchi Sa tâng ki insampui hi anni inhriata kin sîr pehai nôka; zoro lei thenga ki sinthôna mo, atûn laia mo, mâkana sôl ki ni loina hrangin.

³ Khannisianlân, ki mi hruai Tita khom kha Grik mi a ni nâkin, nakhrâtin ser intantir ual mahai.

⁴ Iamtu dol, Jisua Krista Zalênna ei nei enirchik hranga an laia lût inrukhaiiin chu suaka nin lûttir an tuma.

⁵ Aniachu, Thurchi Sa thudik kha nin ta hrangin an indang lamtir loina hrangin voikhat lua irtôl viat nuam ma ung.

⁶ Hruaitu poimo nia inlanghai, an ni tak tak le ni loi, ki ta hrangin danglam ual mah, Pathianin pên tiang inlang dân vai ngaisâng ma, hihai luan insîr hrang ite nei mahai.

⁷ Nei nêkin Petera kha sertanhai laia Thurchi Sa hrilna sin inkoltir a ini ang dênin sertanloihai kuang Thurchi Sa hrilna sin hi ki kuang inkoltir a nih ti an hmu.

⁸ Sertanhai hranga tirtôn ni hranga Petera ta hranga tho pêktu khan, Jentailhai ta hranga tirtôn ni hrangin kei khom a ni itho pe a ni.

⁹ Khanchu, Koiindang dingpuia an ibe tâkhai, Jakoba hai, Kifa hai le Johana hai khom khan, hi dongtum ki idong hi an hmum tho suam kin ni entîrna’n Barnaba leh irpôlna kut chang tiang a ni pêk tâka; keiin Jentailhai laia sin tho kin ta, anni’n sertanhai laia.

¹⁰ An laia inrianghai chu inhre mai hrangin a ni tia, khatak kha ki la itum chian a ni.

Antiokei khuaa Paula’n Petera ar kôk

¹¹ Khan, Kifa kha Antiokei khuaa a hong lai khan dem omin an lang sikin, hmâi ir-enin ki’rkôka.

¹² Jentailhai laia bu a nêk ngaia, khannisian Jakoba kuang ata mi senkhat Jentail ser intantir tumtuhai kha a chia, an hong tung tena chu a chia, a bingin a om tâka.

¹³ Juda danghai khom khan a tho dân an zuia, Barnaba khom an tho dân angin a om sa tâka.

¹⁴ An sintho dân kha Thurchi Sa thu leh irhme mah ti ki hmu’n, an rênga makunga Kifa kuang khan, “Nang Juda ni nia, Juda anga om loiin Jentailhai angin ni hong lênga, kha chunga khom khan ithoa mo Jentailhai kha Juda mi anga inomtir ni itum?” ki tia.

Judahai khom Jentailhai anga iam sika saninhring an ni

¹⁵ Eini chu Juda mi hrang piala suak ei nia, “Jentail mi sual” an iti ngai ang ni mak meh.

¹⁶ Aniachu, Jisua Krista iamna sika vai, Dân zôm sika ni loiin, mi’n Pathian makunga thiam a chang thei a nih ti kin inhriat; Dân zôm sika ni loia Krista iam sika Pathian makunga thiam ei chang theina hrangin keini ngei khom hin Kristaa khan iamna kin irnghat a ni. Tukhomin Dân zôm sikin Pathian makunga thiamchang zoi no nihai.

¹⁷ Krista iam sika Pathian makunga thiamchang tum, keinihai ngei khom hi, “Jentail mi sualhai” anga siatna irngai kin niin chu, Krista khan sual sin a lei tho tihna ma ni? Nâi sai mak.

¹⁸ Ki lei insiat tâk Dân ngêt kha inding thar nôk ki tumin chu, an siattu ki nih ti a ifel a ni.

¹⁹ Keima’n chu, Dân sikin, Dân ki thisan tâk a ni, Pathian tiang chu ki hring theina hrangin Krista kuang krosa hembe ki ni ta.

²⁰ Keima hringna pangaia hring ni ta ma unga, keimaa hin Krista kha a hring tâk a ni. Atûna taksaa ki ihring hi, a ni lungthungtu ki ta hranga hringna pêktu, Pathian Nâipa iama hring ki ni.

²¹ Pathian lungkhamna hi hnôl no ning. Dân zôm sika Pathian makunga thiamchang thei a niin chu, Krista thina hi a korong chian ni a ti.