EZEKIELA 2 - PATHIAN LEKHABU IRTHIANG C.L. Bible (BSI)

Deipu ni hranga Pathianin Ezekiela a koi

¹ Khan ki kuang, “Mihriam nâipa, ngîr ro, ni kuang thu ki ihril nuam kêng,” a ni tia.

² Ki kuang thu a hrilin chu, ki chunga Pathian irtha a zuang lûta, a nin ngîrtira, a thuhril chu ki’rngai tâka.

³ Khan ki kuang, “Mihriam nâipa, kôkirhel Israel nâihai chu ki chunga a sân an suala, an kuang nang ki itîr hrang a ni. An irchibul pi le puhai rengata atûn ten hin ki chunga thilsual an itho a ni.

⁴ An nâihai khom inmôl tak le tukullian an ni. An kuang nang ki itîr a ni. Rengpa pathianin hiang hin a ti, ni va iti hrang a ni.

⁵ Khanchu nam tehel, sual tak nihai khomsian, an irngai mo irngai mahai mo, an laia deipu a om ti inhriat an ti.

⁶ “Mihriam nâipa, nangin anni chu chi no ro, an chongbâihai sikin rot ual no roh. Ni thu zôm no nihaia, nang doi an ti, âinuvêt laia om ang ni ni ti. Tehelzong tak an ni, chihai viat no ro, an hmêl inlang dân khom chi viat no roh.

⁷ Tehelzong tak nihai khomsian, an irngai mo irngai mahai mo, ki thu hi hril mai roh.

⁸ “Khan, mihriam nâipa, nang khom annihai angin tehel no ro, ki thuhril hi irngai ro, ni bâi ângin lân, ki thilpêk hi fa ro,” a ni tia.

⁹ Kut bongin a nin bana, lekhabu irzuat an tûka,

¹⁰ Kut bongin lekhabu irzuat chu a sûta, a pên tiang le a sûng tiang chu irziakin a sip zita. Thu om chu chapna thuhai, sûnna thuhai le inrûmna thuhai a ni.