CHAP HLA 4 - PATHIAN LEKHABU IRTHIANG C.L. Bible (BSI)

Jerusalem siat zoina

¹ Rângachak chu a zîng khak tâk e, rângachak irthiang khom chu a danglam bâk tâka! Hmun irthiang sinna lunghai khom, Kholaidunga an dêngzuanhaia,

² Zion ruathartehai chu rângachak irthiang ang an nia, bêl vuaktu pil bêl ang mai an ni zoi ta.

³ Ine khomin a tê irhnu a ipêk angin, ki mihai rêk hi chu ramchâra vakhohri a tê ifâkhai angin an oma.

⁴ An ipomhai tuihrâl dangchârin an oma, an nâihaiin fâk hrang an zonga, pe phal loiin;

⁵ Fâk nêk sa fâkhai ngaiin, kholaidunga phîngchâmin an oma. Puan senduk silhai ngaiin porinche pai khôm hmu zoi loiin.

⁶ Tûte tôn irman loiin Sodom khua a isiat ang khan, a mihai tuang nêkin ki mihai tuangna hi a natinsat ual.

⁷ Kin ulianhai chu vur nêkin an vâra dûttui angin an taksahai khom a pôla, an ibit momot a ni, Safir lung sinsiam sai anga sahai kha.

⁸ An hmêlhai chu meihol nêkin a duk zoi ta. Tuala an om le om loi inhriat thei ni ta mahai, a hong incher tharhai khom, an em inremin thingkung châr angin an om zoi ta.

⁹ Fâk hrang hmu zoi loi, irzuk ngôi ngôiin phîngchâma thi nêkin chu, khandaia that hoi ual a ti.

¹⁰ Ki mihaiin siatna irkhêl an tongin chu, nu phûkdâi takhai khomin; an nâihai bu anga erin an ifâkhai a ni ta.

¹¹ Rengpa’n a ningmur chu insum zoi loiin Zion khan a ningmurna mei an suaa; a lung phûmhai dênin a siat zoi ta.

¹² Irnênga rênghai le mi murdi’n doitu râlhai Jerusalem khua lût thei hranga an iiamhai ngailoi.

¹³ Deipuhai sual sikin le ochaihai dik loina sika a ni, kho sûnga khan mi dikhai thisen an insuak sika a ni.

¹⁴ Mitchohai angin kholaidunga an irmaia, an songkolhaia khom thisen a kop neng nungin. Tûte itôn a’rthiang ti loiin.

¹⁵ Mihaiin nin porinche fe roi, rot inrang roi, ni tôn nin ti, an tia. Nam tin laia an chaninvâia, hitaka an om hi a sa ti ma ung, an lei ti pehai thiaia.

¹⁶ Rengpa ningmurna an inpung u ual a ni, ite bê’n bê ta maka, deipu khom en nuam ual ta loiin. Kin ulianhai khom don ta loiin;

¹⁷ Ni changpui theiloi sabeina’n mitrithi suakin kin tûng, a ni san theiloi hrang nam, nuama nghâk kin ni.

¹⁸ Râlhai lakin kin hnung an ni’rzûl maia kholaidunga khom chai ngam ma ung, kin irhmang zoi hrang a ni, kin zoro a hek tâka, kin ithi zoi hrang ni a ti.

¹⁹ Irvân ata irmu hrât tak nêkin a ni’rzûltuhai hi an ihrât ual a ni. Tângsîpa khom an ni’rzûla, ramchârna hmuna khom an ni lei khêl ngai.

²⁰ Rengpa sahriak pol kin isong tak khom an chângkama a khita, ama le irrualin nam dang laia khom, om kin ti chu kin tia.

²¹ Uz rama omhai le Edom mi le sahaio, nin thei lai hin raiinfân unglân lôm roi, nin chunga khom siatna nikhua la tung a ti. Inrui nin ta, silkai boiin om nin ti.

²² Zion nâi le tehaiin nin tuang tum tuangin sala intâng ta no chin ni, nangni Edom mihaiin tuang nin ti. Nin sual dânhai khom inlang ving a ti.