CHAP HLA 2 - PATHIAN LEKHABU IRTHIANG C.L. Bible (BSI)

Rengpa’n Jerusalem a hremna

¹ Rengpa ningmurnain, Zion khua chu inthimin a irkhu tâka. Israelhai roiinpuina chu irvân ata hnuaia an thâkpai zoi ta. A ningmurna nî tena chu, a ke irnghatna hnuai a irnghil tâk a ni.

² Rengpa’n ite indîn loiin, Judai ram khuahai chu an siatpaia, A ningmurin an irkulna banghai khom chim zoiin a om ta. An ram le an ulianhai khom a’rzaltirhai zoi ta.

³ A ningmur hmêl irsângin Israelhai hrâtna khom a siat zoi ta. Râlhai an hongin san nuam ta maka, A kôl a kiang kâng irhmang ving anga meipui ir-alin, Jakoba chunga hin a ningmurna a ir-al a ni ta.

⁴ Râl angin a thal irchuan nei a kâpa, A ihmu hnông ngailoi nâi le tehai a that zoi ta. Zion khua in sûnghaia khom, a ningmurna meipuia lûtin ar al ta.

⁵ Rengpa chu râl angin kêng a om ta, Israelhai an lempaihai tâka, an kulhai le an in roiinpuihai a siat zoi ta. Judai ram sûnga beidong irkhêl tak a tung ta.

⁶ Irhuana neinun chu ram angin, an inkhômna in a ram zoi tâka, Zion-a khan inkhômpui le Sabat serna nihai khom a hek ving tâka, a ningmur hrai sikin, an rêng le ochaihai hnôlin an om ta.

⁷ A maichâm chu Rengpa’n a hnôla, a hmun irthiang a mâksana, a banghai khom râlhaiin an insiatpai ta. Râifân taka kût lian an hmang lai ang khan, An râlhai an hong irbuk pehai hut huta.

⁸ Rengpa’n Zion kul lak an siat tum maia, a siat hrang dôr indangin a oma, a kut thâk chu a sân a ina a ni. In irsâng le ar kulna banghai chim zoiin a oma.

⁹ A mikothai khom a bong a bûiin a siata, a inkhâr thîra siamhai khom artan zita, rênghai le an mi lianhai chu sala an intânga, dân irchutir thei khom ni ta mahai, Deipuhai khomin Rengpa inlârnahai ite dong ta mahai.

¹⁰ Zion-a ulianhai chu hnuaia dâihrekin an toia, an lu vâiphin polin bora puan an sila, Jerusalem-a dôngmatehai khom hnuai enin an kûna.

¹¹ Ki mitrithi suak hraina sikin, ite infel ma ung, Ki mihai dongtum kin sâpin kin renhai sabaka. Ki milung a siat sabak a ni. Nâipang le nâitesenhai khom kholaidunga ruak irtet dûlin an oma.

¹² Phîngchâm le tuihrâlin an nuhai kôla an chapa; natna tuang angin an irleta, an nuhai mal chunga an thia.

¹³ O, Jerusalem imo ki itih ta hrang? Nangma ang hi tu mo om? O, Zion dôngmate, itin mo lungngam nang ki la isak hrang? a natna tong chu tuipui lian anga irzatak a ni sikin, tu mo a lan dam thei hrang?

¹⁴ Deipuhaiin chu thil chanlamboi le minlak an hmu suaka. Ni’rlet theina hrangin ni sual irlang ngai mak chea. Inlârna an ihmuhai khom chanlamboi irhuangna a ni.

¹⁵ O, Jerusalem ni kôla fehaiin chu, kut inbênin nang an êsêla; an luheiin, hi hi mo khua hoitak an iti, rammualin a isong kha! an tia.

¹⁶ Ni râlhaiin nang an innuisana, Irfûiin an ha nang an irialkhum a ni. “Kin hong hmu ta kin itum nikhua, kin hmu tâk,” an tia.

¹⁷ Rengpa’n a thil tum chu a tho ta, tiana a thupêk sai chu a tung ta. Indîn viat loiin an siata, a râlhai chu raifânin in sûnga an lâma.

¹⁸ O, Jerusalem ni banghai khan Rengpa koi ta ri sehai, a sûn a zânin ni mitrithi chu tuipui angin luang ri se. Mong viat loiin chap mai ta roh.

¹⁹ Thoiin lân, zân khovârin Rengpa koi ro, Rengpa makunga ni lungrîl chu tui angin bunthuanin lân, Kholaidunga ni nâihai phîngchâm tuanghai hringna hrangin, bân phar pumin zong roh. Nâipang kotsua kil tina phîngchâm dangchârhai hringna hranga khan.

²⁰ Rengpa hiang dôra ni isoisak tâk hi en ro, an nâi pom lai taka, an hmêhai hi an nuhai fâk ni iphal hrang ma ni? Deipuhai le ochaihai khom hi Rengpa hmun irthianga sâra thi ni iphal hrang ma ni?

²¹ Kholaidunga nâipang le tarhai thi omhai, ruathar dôngma khandaia thi, lungkhamna nei viat loi hi a irsam loi moh.

²² Inkhômpui uara fe intam angin ni ningmur nia chu, hmun tina ni râlhai ni bukkhôma. Rengpa ningmurna sûn khêla zôk om loiin, kin nâi pom laihai, kin indit ngôi ngôi, râlhai ithat zoi.