2 THURCHI SUINA 4 - PATHIAN LEKHABU IRTHIANG C.L. Bible (BSI)

Tempil sûnga neinun

¹ Khan, dâr maichâm a sei lam mûk sômhni a lian lam mûk sômhni, ar sâng lam mûk sômin a sin saa.

² Dâr tuipang lianpa mûk sôma lian, ar sâng lam chu mûk ringa a ni; a lian lam chu mûk sômthum vêl a ni.

³ Dâr tuipang pên tiang chu thâr hniin an irvôtira, an irvôtirna chu sehrâtchal irlim a ni, a panga inkhop sa a ni.

⁴ Dâr tuipang chu sehrâtchal irlim sômhleihni chunga irnghatin, inthumin sim tiang an irheitira, hmâr tiang, nisua tiang le nitâk tiang inthu thumin an irheitirhai chita, an hnung irsongsanin.

⁵ Dâr tuipang chu kutzapha dôra irsa a nia, a hner par chu khilât par angin, lili pâr ang hin a para.

⁶ Tui irsilna hrang tâbor lian sômkhat a sina, chang tiang ringa a siaa, vei tiang ringa a siaa; annihai kha hâlirvôm thilinhlanna hrang a ni; dâr tuipang rêk chu ochaihai tui irsilna hrang a ni.

⁷ Khan, a sin hrang dân a ihril angin rângachak meiser siana sômkhat a sina, biak in sûnga chang tiang panga le vei lampanghai khan a siaa.

⁸ Dokâng sômkhat a sin saa, biak in sûnga khan chang tiang le vei tiang a siahaia. Khan, rângachak tâbor lian irzakhat a sin saa.

⁹ Kha ti no khom kholâi ochaihai ta hrang le, a pên tiang uala khom kholâi lian ual ar kul saa, inkhâr lianpa a sin saa, dâr tui leh an luana.

¹⁰ Khan, dâr tuipang chu simnisua tianga enin ar kula,

¹¹ khan Hurama’n, bêlhai, irvut painahai, tâborhai a sina; khanchu Hurama’n a’rzoitir tâka.

¹² Chopui inhnihai, bêl anga a ring omin, chopui sîpa bêl anga a ring nei inhni tuamna chial chikchak inhnihai,

¹³ annihai tuamna chial chikchak inhnihai hrangin dalim irzaminlihai, chopui sîpa bêl anga a ring nei inhni tuamna hrang chial chikchak ru ruai ta hrangin dalim thuahni hai,

¹⁴ suankualhai a sina, suankual chunga tâborhai an toitira,

¹⁵ tuipang inkhat le a hnuaia sehrâtchal sômhleihnihai le,

¹⁶ bêlhai, irvut painahai, dâr thîrkut le bêlbûr murdihai kha Hurama khan Rengpa in ta hrangin dâr innôt irtêka rêng Solomona isiam pe a ni.

¹⁷ Khahai kha Jordan phâizôla Sukoth le Zereda pil sungna hmuna, rêng khan a sunga.

¹⁸ Khaang khan Solomona’n bêlbûr tamtak a sina, dâr chu varh zoi zât ni maka.

¹⁹ Khan, Solomona’n Pathian ina bêlbûr om murdi chu a sina, rângachak maichâmhai, bai siana dokânghai;

²⁰ a iti angin Hmun Irthiang kôla inchok hrang meiser siana hai, meiser hâlin, rângachak fel fâi tak leh a sina;

²¹ Khan, pârhai, meiserhai le meichephai chu rângachak feltaka sin a ni.

²² Khan, meiser puan inchepna hai, tâbor hai, mikhe hai, mei lâkna hai khom rângachak feltaka sin sain; khan in sûng lûtna, in sûngrîl uala Hmun Irthiang tak inkhârhai le a in, biak inhai chu rângachakin a sina.