2 KORINTH 7 - PATHIAN LEKHABU IRTHIANG C.L. Bible (BSI)

¹ Ki rual lungthunghai, kha chonginkunghai murdi kha eini hrang a ni. Khasika khan, takpum le irtha porinche thei thil ata irkiang ei ta, Pathian mahrip tho pumin irthiangna irkiptir ei ti.

Koiindang mihai irletnaa Paula lômthu

² Nin lungrîl hmun nin ken roi. Tûte chunga tho’nsual ma unga, tûte insiat ma unga, tûte chunga khom inlâpna zong ma ung.

³ Ama kha thiamno inchangna hranga ki iti ni mah; matona ki iti tâk ang khan, lung nin ni thung ok sikin hmunkhatin ei iom mai a ni, ei hring le khom ei thi le khom.

⁴ Nangni kin hriat infel oka, nangni ki song tak tak a ni. Kin buaina tinrêng khoma khan lungrîl hrâtna’n ki sip maia; râifânna’n ki isip lêt a ni.

⁵ Makedonia ki tung hnung khoma khan, irngamna zel nei ma ung. Hmun tina buaina a oma, mi leh irsualin kin oma, kin lungrîla chitna kin nei.

⁶ Khannisian, Pathian, lungrîl ngûi inthorinhar ngaitu khan Tita hongna sikin a nin thorinhartir.

⁷ A hongna ringot kha nin ilôm ni maka, ama nin lei inthor inharzia a ni hrilna khom kha a nia. Ama khan, ni hmu nin nuamzia hai, nin milung nin ni inlêngpuizia hai le ni thop hranga nin irsiamzia hai a ni hril sikin, atûna hin chu ki lôm ual ok tâk.

⁸ Ki lekha thon khan lungdûk nangni tho khom sian, irsîr ta ma ung, zoro sôt ok loi chu lungdûk nangni a tho ti kin hriata, ki irsîr a ni.

⁹ Khannisianlân, atûn chu ki râi a fân ok, lungdûk nangni ki tho sika ni loiin, nin lungdûkna khan nin lampui nangni an tung sikin a ni. Kha lungdûkna kha Pathianin a ihmang a ni, khasikin nin chunga tho’nsual ma ung.

¹⁰ Lungdûkna, Pathianin a ihmang khan lungrîl irthûlna nangni pêkin saninhringna nangni an tungtir sikin. Khannisianlân, mihriam ringot lungdûkna chu thina a tung ngai.

¹¹ En u ta, nin lungdûknaa Pathian sintho hi, sathnem irngaina nangni an neizia hai, nin irthiangzia fia nin nuam dân hai, ninginthikna hai, irningna hai, ngaituana hai, irpêkna hai, tho’nsualna hai dengintheina hai hranga nin irsiam dân hai kha! kha thu rêng rênga khan nangni chu sêlna om mak chêi ti nin inlang a ni.

¹² Khasikin nin kuang irziak inlân khom a sual thotu sika khan ki irziak ni maka, a sual tuangtu sika khan khom ki irziak ni maka, kin chunga nin sathnem irngaizia Pathian mit hmua nin kuanga inhriattira a om theina hrangin ki irziak ual a ni.

¹³ Khasika khan kêng inthorinharin kin iom. Inthorinhara kin iom vai ni loiin, Tita nin lei changpuina zâra a lômna sikin keini khom a ni inlôm tak tak a ni.

¹⁴ A kuanga nangni song ngai khom inlân, mualinphoi ma ung. Nin kuang thutak kin hril mai ngai, khaang khan, Tita kuanga nangni ki songna khan a dik iti a ifia a ni.

¹⁵ An irchûna thuhai zôm hranga nin rêngin nin irsiam zia hai, ichi le inthing puma ama nin lei lômzia hai kha an hriat mai sikin, nin ta hranga a lungthungna ar sôn ual ok ta.

¹⁶ Nangni ki’rnghat zit thei sikin ki lôm tak tak a ni.