2 KORINTH 5 - PATHIAN LEKHABU IRTHIANG C.L. Bible (BSI)

¹ Ei omna irnênga in hi siat khom sian, irvâna in, kuta sinloi, kumtuanga om mai hrang, Pathian kuanga in det chu ei neih ti ei inhriat.

² Irvâna ei omna hrang ina khan, a nir khu hrang irzuk tak takin hi ina hin ei inrung tak tak ngai a ni;

³ Kha kha ei silin chu takpum boiin om no ih.

⁴ Hi irnêng ina ei om laia hin puak rikin ei inrung tak taka, silkai boia om ei nuam sika ni maka, silkai thua om ei nuam sika a ni, thi thei hi hringna inlem zoiin a om theina hrangin.

⁵ Khaang hranga khan a ni siam irfûktirtu chu Pathian a ni, irkhâmna Irtha ni pêktu kha.

⁶ Khasika khan takpum ei om sûng hin Rengpa kuang om mak meh ti inhriatin kumkhua’n ir-ial takin ei om ngai.

⁷ Ei hringna hi hmu theia fe loiin, iamna’n ei ife ual a ni.

⁸ Ir-ial takin ei om, ki iti, taksaa om loia Rengpa kuanga om ei nuam ual a ni.

⁹ Khasikin om inlân, om no inlân, ama nuamlam mi ni ei itum ngit ngai hrang a ni.

¹⁰ Mi tinin taksaa sinthohai, a sia mo, a sa mo, ei itho ang taka ei hmu theina hrangin Krista roirêlna toihmun makunga khan inlangin ei iom zit hrang a ni.

Krista zâra Pathian leh rual irchangna

¹¹ Rengpa chi lam kin hriata, mi kin inthêm ngai a ni. Pathianin a nin hriat infel zit, nangni khomin nin lungrîlin nin hriat infel sa nin ti ki tûng.

¹² Nin kuang kin sa lam kin insîr ni mah, om dân tiang ni loia kha a chungphua ringota irsong ngaihai kha nin sâm theina hrangin keini nin ni songna hrang bi nangni kin insîr pe ual a ni.

¹³ Kin into ta tak ma ni? Pathian hrang sika a ni. A ninole kin ivâr ma ni? Nangni hrang sika a ni.

¹⁴ Krista lungthungna’n a ni irêl a ni, mi tin ta hrangin mi inkhat a thia, kha omzia chu an rêngin a thina kha an irkoppui a nih ti atûn chu kin infel ta.

¹⁵ Khan, a hringhai khan anni ta hrangin hring ta loia, an ta hrang sika thia thoinôktu ta hrang vaia an iam theina hrang takin a ni, mi murdi ta hrangin a ithi kha.

¹⁶ Khasikin mihriam irkhî lamin tûte hril insiat ta no ni ung. Mihriam irkhî dânin Krista lei inhre ta khom unglân, tho ta ma ung.

¹⁷ Tukhom, Kristaa a omin chu, thilsiamthar a hong nia, thil miluihai chu a boia, irngai u ta, a hong thar ta.

¹⁸ Khahai tinrêng kha ei râl irchangna irthoka Krista zâra a rualhai ni siama, mi dang khom a rualhai a siam theina sin ni pêktu Pathian khan a isin a ni.

¹⁹ Kin thu’nsîr chu hi hi a ni, Pathianin Krista zârin mi tinrêng a rualhaiin a siam tâk. An sualhai kha insâp pe ta loiin, a rualhaia a siamzia thu kha keini hi a ni ipêk tâk a ni.

²⁰ Khasikin Krista hranga palai kin ni. Pathianin nangni a ngênna kha keinia a ibâng a ni. Krista irthûlin nangni kin ngên: Pathianin râl nin nina irthokin a rualhaiin nangni siam ri se.

²¹ Krista khan sual nei mah, Khannisian, ama leh irzoma Pathian felna kha ei dong sa theina hrangin Pathianin ei sual a indong a ni.