2 KORINTH 2 - PATHIAN LEKHABU IRTHIANG C.L. Bible (BSI)

¹ Khasikin, irngaiinsiat nangni sak hrangin chu nin kuanga hong nôk ta no inlân ti ki lunginchong tâk a ni.

² Irngaiinsiat nangni sak inlân, tu’n mo raifân ni sak hranga? Ngaisiat ki sakhai ti no chu tûte om mah.

³ Ki hong tika nin lômtir hranghaiin ki milung inna loina hrangin kha lekha kha nangni ki hong ithon a ni. Ki râi a fânin chu nangni khom nin râi a fân sa ngai tih kin hriat sikin.

⁴ Lungrîl inbuai le beiindong taka mit irthi tam tak tâkpuma ki irziak a ni; ki thil tum chu nin milung innatir loia, nin rênga lung nangni ki ithungzia hi nin inhriat theina hrangin a ni.

Thil tho’nsualtu ta hranga ngaidamna

⁵ Atûn hin tukhomin mi lungrîl an natirin chu, keima lungrîl innatir ni maka, nin rêngin nangni lungrîl nangni a inna vi viat pak a ni. (Hi ki iti nasan chu a chunga inngar hrai ki nuam no sika a ni).

⁶ Kha mi kha chu nin laia mi a tam ualin kha anga dûk nin itho kha a iruk a ni.

⁷ Khan khoma ngaidam unglân, lungrîl na’n a sip hrai nona hrangin inthor sa roi.

⁸ Khaanga, ama kha lung nin thung ta tak tih inhre hrangin nangni ki ngên.

⁹ Nin kuanga ki’rziak nasan chu fianahaia nin lei hong inngîr insa dân le nangni ki hrilna chong zoro tina zôm mai hrangin mo nin irsiam tih inhriat ki nuam sika a ni.

¹⁰ Mi tukhom nin ingaidam ka chu kei khomin ki ngaidam. Keima khomin ki ingaidam tâk chu, a dik takin i khom ngaidam hrang ki inei chu nangni sikin Krista makunga ki ingaidam ngai a ni.

¹¹ Setana’n ei chunga zoro’nchum a hmu loina hrangin; a tumnahai ei inhriat chian sikin.

Troas khuaa Paula lungdûkna

¹² Krista Thurchi Sa insîr hrangin Troas ki tungin chu, khataka sintho hrangin Rengpa’n lam a nin hong pe ki hmu.

¹³ Khannisianlân, ei urêngpa Tita ki hmu no sikin ki milung dûk a tong ok. Khasikin khataka mihai kha chongbâi hoiin kin thaa, Makedonia rama ki fe ta.

Krista zâra inhnêna

¹⁴ Khannisianlân, Pathian kuang lômthu om ri se! Krista inhnêna sika lampui hrôna khan mi intâng ang khan Pathianin Krista leh irzomin a ni hruai mai ngai sikin. Krista inhriatna thu kha hmun tina mirimhoi ang khan irthekindarh hrangin Pathianin a ni ihmang ngai a ni.

¹⁵ Keini chu Krista’n mirimhoi hâl Pathian kuang a inhlan, saninhring thiaihai le ar hmang thiaihai laia inthekindarh ang kha kin ni.

¹⁶ A’rhmang thiaihai ta hrangin chu thina hrang mirimsia a nia; saninhring thiaihai ta hrangin chu hringna hrang mirimhoi a ni. Khante, tu mo kha sin hranga a chuk hrang tâk?

¹⁷ Mi tamtak chu Pathian thu hi irvaina hmang an iom ang khan, keini chu hmang ma ung. Pathianin a ni tîrna sikin Krista zuituhai ang khan Pathian mit hmua dik takin kin ichong a ni.