2 KORINTH 13 - PATHIAN LEKHABU IRTHIANG C.L. Bible (BSI)

Lei hrilna hnungkhôn le chubai mûkna

¹ Atûna nin kuanga ki izuang hrang hi a voi thumna hrang a ni. Pathian Thubu’n a iti ang khan, “Hnôlna kha inhriatpuitu inhni mani, inthum mani an om vaiin indet ni a ti,” ti a ni.

² Zoro theng tâka sual sinhai le mi dang murdihai khom nangni hril ki inuam a ni. Nin laia ki zuang a voi hninaa khan ki ti tâka, atûn hin nin kuang ki om no sikin ti nôk ki ti: Ki zuang nôkin chu tûte dengintheitirna irthokin zôk no chin ni.

³ Krista, keimaa chong ngai fiana nin izong ngai kha a rêngin hmu nin ti. Ama kha nangni a ngaitua zoro’n irzal ngai maka; kha nêkin, nin laia a sinthotheina a inlang ual ngai a ni.

⁴ Ama kha hrât loina’n Krosa hembe’n om khom sianlân, Pathian sinthotheina’n a ihring mai a ni. Keini khom ama le irzomin kin ihrât loi a ni; Khannisian, nangni leh kin irmanna sikin a hringna khan Pathian sinthotheina dong sa kin ti.

⁵ Iamna khan nin om le om loi nin irhriat theina hrangin nin bingin irfia ngai unglân, nangni ngeiin irfia ngai roi. A ninole, nangnia Jisua Krista kha a om ti nangni ngeiin nin irhriat infel loi ma ni? Irhriatna nin la nei no’n chu a dol chian nin la ni.

⁶ Irfiana khan keini chu hlosam ma ung ti lan hria nin tih ki tûng.

⁷ Ite thil nin tho’nsual loina hrangin Pathian kuang kin nghi ngai, hlo kin chuk tih inlangna hranga ni loiin, hlosam khom inlân, nangni’n thil dik nin tho theina hranga a ni ual.

⁸ Thutak hrang sika ni no’n chu, a doi hrangin chu sin tho thei ma ung.

⁹ Kin irzal zoro khomin nin lei hrât ngai sikin kin ilôm a ni. Khasikin nin sa irkipna hrang khomin kin nghi sa ngai.

¹⁰ Khasika khan kêng hi hi nin kuang ki om loi zoro’n ki irziak; nangni setna hrang ni loia nangni indingna hranga Rengpa’n irchamneina a ni ipêk kha hmanga ki zuang tung tikin nangni ki’rkôk rak loina hrangin.

¹¹ Atûn chu, ki urênghai, lôm takin om roi. Sat irkipna hrangin irnak song unglân; ki ngênna irngai unglân; lung inrualin om unglân, irtha irngam takin om roi. Khanchu, lungthungna le irngeina Pathian kha nin kuang om a ti.

¹² Urêng irtumna’n chubai irmûk irhlôm roi.

¹³ Pathian mihai murdi’n chubai nangni an mûk.

¹⁴ Rengpa Jisua Krista lungkhamna, Pathian lungkhamna le Irtha Irthiang pôlna kha nin rênga chunga om ri se.