2 KORINTH 12 - PATHIAN LEKHABU IRTHIANG C.L. Bible (BSI)

Paula thil hmu le inhriattirna

¹ Ki irsong hrang rêng rêng a ni, ite ar fêna a om no hrang khomin. Khannisianlân, atûn Pathianin inlârna a ni irhmu le thu phuang hrang a ni ipêkhai kha insîr ki ti.

² Kum sômhleiminli matona khan Kristian mi inkhat, irvân irsâng taka khin zuang ilâkin a om ti kin hriat (ama kha a tak mani, inlârna a ihmu mani, inhre ma ung Pathian vaiin an hriat).

^3-4 Ki ti nôk, kha mi kha Paradisa zuang lâkin a om ti kin hriat, (Ama khom kha a tak mani, inlârna a i hmu mani, inhre ma ung. Pathian vaiin an hriat). Khan, ama khan chonga insîr theiloi le mihriam insîr hranga phal ni loi thil a hong inhriata.

⁵ Khasikin kha mi kha song ki ti, khannisian, ki’rzalzia inlang thilhai ti no chu keima chu irsong no ning.

⁶ Irsong nuam khom inlân, into ni no ning, thu dik tak kin sîr hrang sikin. Khannisian, irsong no ning, tukhomin an ni hmu lam le keima ata thu an inhriat lam nêkin an ni’rngaiirsâng loina hrangin.

⁷ Thilirkhêl tamtak ki ihmuhai sika khan irpâkna’n ki sip loina hrangin, taksa a satêna dam loina tak pêkin ki iom a ni, kha kha ki’rpâk loina hranga Setana tirtôn anga sinthoa ni zêm ngai a ni.

⁸ Hi natna hi nir kiangtir pe hrangin Rengpa kuang voi thum ki nghi.

⁹ Khannisianlân, ama khan, “Ki lungkhamna hi kêng ni irhelpui tak, ni hrât loi zoro’n kêng ki sinthotheina a irkip ngai,” tiin a ni sâm. Khasikin ki chunga Krista sinthotheina ki chunga a om theina hrangin lôm takin ki hrât loinahai hi song ual ta ki ti.

¹⁰ Krista sikin chu hrât loinahai, hmusitnahai, hnuaisianahai, dengintheitirnahai le intaknahai khom ki milung a chuk. Ki hrât loi zoro rikipa ki hrât ngai sikin.

Paula’n Korinth mihai a ngaituana

¹¹ Into angin ki iom a ni, nangni’n into hrangin nin ni inphût sikin. Nangni’n kêng nin ni inhamna inlang hrang nin ini. Ite ni no khom inlân, nin “tirtôn” lianhai nêkin chu i lama khom chîn ual no ning.

¹² Tirtôn ki nih ti fiana sinirkhêl le thilirkhêl tamtak nin laia diarna ta tak neiin sin a ni ta.

¹³ Koiindang danghai nêka saloi uala enin itin mo nin iom? Poisa tianga nangni kin buai loina kha a ni no’nte. Ngaihoi takin kha fel zoi loina kha chu ni ngaidam roi!

¹⁴ Atûna hi nin kuang zuang hranga ki irsiam a voi thumna a ni tâka, khan, ite nangni sîng no ning. Ki izong chu nangni kha nin ni, nin poisa ni mah. Khannisianlân, nâihaiin an nu le pahai sem hrang an nei hrang ni maka, nu le pahaiin an nâihai sem hrang an inei ual hrang a ni.

¹⁵ Nangni changpuina hrangin ki inei murdi lôm takin hmang zoi ki ta, keima khom irhmang zoiin om ki ti. Lung nangni ki thung okna sika khan lung nin ni ithung bak loi hrang ma ni?

¹⁶ Puakrik nangni ki ichang pe loi kha chu inham nin ti. Khannisianlân, tu’n mani ama kha milaka sip, milakin nangni a in-ôk tâk kêng la ti a ti.

¹⁷ Itin mo? Nin laia ki zuang itîrhai hmangin nin chunga inlâpna mo ki zonga?

¹⁸ Tita kha zuang hrangin ki ngên, ama le Kristian urêng dang kha ki zuang itîr a ni. Tita’n kin chunga inlâpna a zong nin iti thei hrang ma ni? Ama le keima hi lunginchong irhmunin châng dân hmunkhatin châng ngai ma ung mo?

¹⁹ Nin kuang ki thiamna thu insîr mai nin ni sôn thei. Ni make! Krista einia chong ang khan Pathian makunga kin iti a ni, thil tinrêng kin isinhai hi rual lungthunghai, nangni changpuina hrang zit a ni.

²⁰ Ki zuang tikin ki nuam lamin nangni ki hmu no itinin ti le nangni khomin nin nuam lamin nin ni hmu no itinin ti hi, ki ichi a ni. Khabana irngôna hai, irhnarsâna hai, ningmurna hai, ir-êngna hai, insirinsiatna hai, irnuisôna hai le lârirpâkna hai buaina hai nin laia ki hmu itinin ti ki ichi sa a ni.

²¹ Ki zuang nôk tika nin mithmua ki Pathianin ni mualinphoitir a ta, matona thil sual thohai, an thil porinche tho, irditna hai, hurna hai irlet ual loiin mi tamtak sikin chapna ki ti, tih hi ki ichi sa a ni.