2 KORINTH 11 - PATHIAN LEKHABU IRTHIANG C.L. Bible (BSI)

Paula le tîrtôn dolhai

¹ Into viat anga ki om zoro lai khomin nin ni ituangpui hrangin ki nuam. Ngaihoi takin ni tuangpui roi!

² Pathian hnarsâna angin kêng nang ki hnarsa; dôngmate irthiang ang nin nia, pasal ruathar inkhat, Krista ngei kha, nangni innei hranga ki lei inkung pehai nin ni.

³ Nin lung sûng kha hong siatin Kristaa nin irpêkna rikip le irthiang kha marak nin ti, ti ki ichi a ni, khaang khan Evi kha mirûl butdi milak khan inthêmin a iom a ni.

⁴ Tu mani nin kuang zuangin Jisua dang, a thu kin insîr ni loi a zuang insîra, lôm taka nin lei irngai thei sik le keinia nin ihmu Irtha le Thurchi Sa ni viat loi irtha dang le thurchi sa dang nin lei pom sikin.

⁵ Nin “tirtôn” lianhai nêka chîn ual hrangin chu irtûng ma ung!

⁶ Thu’nsîr chu ki thei rak no khom a ni thei, khannisian, inhriatnaa chu khaang khan ni viat mah; ama kha chu itiklai khomin tinrênga nangni kin infel pe tâk a ni.

⁷ Nin kuang Pathian Thurchi Sa ki zuang insîr laia khan ite thil nangni ngên ma ung; nangni chôiindômna hrangin keima ki irhniam a ni kha. Kha khan ki itho’nsual ma ni?

⁸ Nin laia sin ki tho zoro’n Koiindang danghaiin hlo an ni ipêk ngai a ni. Nangni changpuina hrangin, Koiindanghai sum kêng ki inhek pehai ngai.

⁹ Nin kuang ki om sûngin poisa ki’rsam laia khan tûte nangni inbuai ma ung; Makedonia rama irthoka urêng zuanghai khan ki irsam tinrêng an ni zuang ichôi pe a ni. Sûn hnung tianga ang khan sûnmatona khom nangni angin phurrik ni viat no ning!

¹⁰ Krista thutak keimaa om sika khan hi ki’rsongna hi Akaia ram pumpuia dâihrek no ni.

¹¹ Lung nangni ki thung no sika hi hi ki iti ma ni? Lung nangni ki thung iti Pathianin an hriat!

¹² Atûn hin sin tho mai ki ti, tirtôn danghai kha an irsong thei loina hrang le keini sintho lam ang takin sin an tho, an ti thei loina hrangin.

¹³ Kha mihai kha tirtôn dik ni mahai: tirtôn dolhai, an sinthoa milak thoa, Krista tirtôn dikhai anga inlang hranga irsiam an ni.

¹⁴ Kha kha a sa, irkhêl ual mah! Setana khom vâr vântîrtôn anga inlang hrangin ar siam kha te!

¹⁵ Khasikin a tirtônhai khomin felna tirtônhai anga inlang hranga an irsiam hi thilirkhêl ni mah. A hnungkhôna chu an sintho ang takin la hmu an ti.

Tîrtôn ninaa Paula tuangna

¹⁶ Ki ti nôk: tûte’n into’n ni bê no ri sehai. Khannisianlân, nin ni bê’n chu, a chînte lua ki’rsong theina hrangin into angin ni pom roi.

¹⁷ A dik takin, atûna ki iti hi chu Rengpa thu angin ti ma ung; hi irsongna thua hin chu into ang takin ki iti a ni.

¹⁸ Khannisianlân, mi tamtak mihriam nitna song an om sikin, kei khom song ki ti.

¹⁹ Nangni chu vâr tak tak, khasikin intohai lôm takin nin ituangpui a ni!

²⁰ Nangni chu mi’n suakin nangni siamin, nangni fa khôt zoiin, nangni huangin, chânga nangni in-ôktirin, nangni enkhûm khom sian, nin hmâia nangni inbên khom sian, nin tuang zoi zit ngai.

²¹ Khahai tho hrangin chu kin chi hrai sikin a pom khom kin zak. Khannisianlân, tukhomin i ang lama khom an irsong ngamin chu, into angin ki ichong a ni, kei khom ki’rsong ngam.

²² Hebrai mi mo an ini? Kei khom ki ni. Israel mi mo an ini? Kei khom ki ni; Abrahama irchi mo an ini? Kei khom ki ni.

²³ Krista sinthotuhai mo an ini? Into ang riaiin hong hrilin lân, anni hrangin chu tirtôn sa ual ki ni! Sintho intam uala irnak song ual ki ni, intângna ina kin tâng intam uala, zêm laka ki tuang intam ual taka, thi zôi zel theina khom ki tong intam tâk a ni.

²⁴ Judahaiin voi sôminthum voi kuaka vîka tarâng ringa an ni zêm.

²⁵ Voi thum Rom-haiin an ni zêma, voi khat lungin an ni dênga. Voi thum irkuang siatna ki tonga, voi khat chu zân khat le sûn khat tui chunga ki om.

²⁶ Kin zinna voi tamtak ichiomna ki tong ngai, tuia ata, hrâtlâksonghai ata, ki Juda chanpuihai ata, Jentailhai ata, khopui sûng ata ramchâr ata, tuipui ata chitna ki tong chi chian ngai.

²⁷ Sin intamin ki buaia, fâkrua ki’rsam mai ngaia, silkai boiin phalbi dâi ki tuang ngai.

²⁸ Hihai bana khom hin Koiindang murdihai ki ngaituana, a nitin ni del chianin a om sa ngai.

²⁹ Mi hrât loihai ki ituangpui ngailoi ma ni? Mi an tûkin ki irvei ngai loi ma ni?

³⁰ Ki song ngêt hrangin chu ki hrât loizia inlang thilhai hi song ki ti.

³¹ Rengpa Jisua Pa le Pathianin milak ki itho loizia an hriat. Ama kha kumtuangin inpâkin om ri se.

³² Damaska khuaa khan rêng Areta hnuaia roirêltu khan ni chel tumin Damaska khua kha mi an nghâktira.

³³ Khannisian, kokin kulpui bang ir-ônga an nin thâka, kha roirêltu ata ki izôk a ni.