2 KORINTH 1 - PATHIAN LEKHABU IRTHIANG C.L. Bible (BSI)

¹ Paula, Pathian lungdoa Krista Jisua tirtôn le ei urêngpa Timothea khan, Korinth khuaa Pathian Koiindanghai le Akaia ram pumpuia Pathian mihai kuang khan:

² Pathian ei Pa le ei Rengpa Jisua Krista’n lungkhamna le irngeina nangni pe ri se.

Paula’n Pathian kuanga lômthu an sîrna

³ Ei Rengpa Jisua Krista Pathian le Pa, khonzana sip, Pa, changpuina murdi luangsuakna Pathian kuanga lômthu insîr ei ti.

⁴ A kuanga irthok ata ei idong changpuina ngei kha hmangin buaina chi tinrêng nei mihai ei changpui theina hrangin ei buaina tinrênga Pathianin a ni changpui ngai.

⁵ Krista tuangna tam takhaia dongtum ei inei ang khan Krista zârin Pathian changpuina lian khoma dongtum ei inei a ni.

⁶ Kin tuangin chu, changpuina le saninhringna nin hmûna hrang a ni; changpuina kin omin chu, nangni khom changpuiin nin oma, tuangna kin ituang kha tuangtheina neia ituang hrangin hrâtna ipêkin nin iom a ni.

⁷ Khasikin nangnia kin tûngna kha inhnîng viat ngai mah; kin tuangnahaia dongtum nin inei ang khan kin changpuina donghai khoma hin dongtum nin nei sa ti kin hriat.

⁸ Urênghai, Asia rama buaina kin itong thurchi kha inhriat tharna nangni pêk kin nuam. Kin chunga puak isiahai kha a lian hrai sik le a rik hrai sika khan la hring hrang tûngna rêng nei ma ung.

⁹ Kin chunga thina roi an irêl tâkin kin hriat. Khannisianlân, kha kha chu nangnia irnghat loia Pathian, mithi kaithoi ngaitu kuang kin irnghat thei ualna hranga a lei ni.

¹⁰ Ama khan kha thina ichiom tak ata kha a ni saninhring tâka, ni la saninhring a ti; ni la saninhring nôk mai a ti, tiin kin tûngna amaa kin irnghata,

¹¹ nangni khomin kin ta hranga chongchaia nin ni changpui ang khan. Khanchu, kin ta hranga chongchaina tam takhai kha sâmin Pathianin sat a ni vur ta, kin irthûlin mi tam takin a kuanga lômthu insîr an ti.

Paula tumna irthûlna

¹² Hi rammuala kin hringnuna le a bîkin nangni leh kin irzomna khan lungkhamna sinthotheina sikin Pathian ipêk irthiangna le dikna an ni vong ti kin sia le sa inhriatna’n a ni hril sikin kin irsong a ni.

^13-14 Nin itep thei le nin inhriat thei kai kêng nin kuang kin irziak. Atûn ni lan hre thei ving no khom unglân, ni lan hriat thei tak tak nin tih ti ki tûng, ei Rengpa Jisua Nikhuaa khan nangni kin song lam ang taka nin ni song theina hrangin.

¹⁵ Khahai murdi kha kin hriat infel, voi hni satvura nin om theina hrangin nangni hong hro bak ki tum.

¹⁶ Makedonia rama ki fe malamin nangni hong hroa, ki hong kîr nôk tiang khom nangni hong hro nôk ki tum a ni, Judai rama kin zinna hranga khan nin ni changpui theina hrangin.

¹⁷ Hi ki tumna sika hin tumna detloi mi ang khan ki inlang ma ni? Hi ki tumnahai hi mâni hranga sa tûng sika “A ni, a ni” le “Ni mak, ni mak”, inrual taka ti hranga tum mo ki ini ma ni?

¹⁸ Pathian thutak hril a ifel ang khan nin kuanga ki chonginkung khom kha “A ni” le “Ni mak” ni mah.

¹⁹ Pathian Nâipa, Jisua Krista, a thu Sila, Timothea le keima’n kin insîr kha, “A ni,” le “Ni mak,” a ni no sikin, Ama kha Pathian “A ni” ti a ni.

²⁰ Pathian chonginkunghai murdi “A ni” a ni sikin. Khasika khan kêng Jisua Krista zârin Pathian roiinpuina hrangin “Amen” ei ti ngai.

²¹ Krista leh irzoma nangni le hringna nin hmutirtu kha Pathian a nia, a sintho hranga nin dangtu khom ama dên a ni,

²² ama khan ama ta ei nina irsinsia ei chunga a siaa, ei ta hranga thil a ibûmhai khapna’n ei lungrîla Irtha Irthiang a ni ipêk a ni.

²³ Ki inhriatpuitu hrangin Pathian ki ikoi a ni, ama khan ki lungrîl an hriat. Nangni hoi hrang sika Korinth khua ki hong kâi ta loi a ni.

²⁴ Nin iam ngêt hrang thu nangni insîr pe tum ma ung, iamnaa khan nin ngîr indet ti kin hriat sikin. Kha nêkin, nin raifânna hrangin nangni leh sin kin tho ual a ni.