1 THURCHI SUINA 4 - PATHIAN LEKHABU IRTHIANG C.L. Bible (BSI)

Juda irchihai

¹ Hihai hi Juda irchi senkhathai chu an ni. Pereza, Hezrona, Karmia, Hura, Sobala,

² Sobala’n Reaia a neia, ama hin Jahata a neia. Jahata hin Ahumaia le Lahada Zora khuaa omhai neitu a ni.

³ Kaleba le Efrati nâilutîr chu Hura a ni, Bethlehem khua indingtirtu a ni. Hura’n nâipasal inthum Etama, Penuela le Ezera a neia. Etama’n nâipasal inthum Jereel, Isma, Idbasa hai a neia, nâinupang inkhat Hazelelponi a nei.

⁴ Penuela hi Gedor khua indingtirtu a ni, Ezera hi Husa khua indingtirtu a ni.

⁵ Tekoa khua indingtu Asura’n dôngma inhni Heli le Naari a neia,

⁶ Naari leh nâipasal minli, Ahuzama, Hefera, Temenia le Hahastaria a neia.

⁷ Heli leh nâipasal inthum, Zereta, Izhara, Ethnana hai an ni.

⁸ Khan, Hakoza’n Anuba hai, Zobeba hai, Haruma nâipa Aharhela irchihai a neia.

⁹ An irchi laia mi mahripom tak Jabeza a oma, a nu hin, “Na ti ngôia ki inei a ni sikin,” tiin ar hming khom Jabez a iphua a ni.

¹⁰ Israel hai Pathian kuang Jabeza chu a chongchaia, “O Pathian, sat ni vurin lân, ram irzat tak ni pe’n lân, nâ ki tuang loina hrangin thil saloihai ata ni hrungin lân, ni ompui mai ro,” a tia. Khanchu Pathianin a izong angin a ompui a ni.

In sûngkua dang thurchi

¹¹ Suha urêngpa Kaleba’n nâipasal Mehira a neia, Mehira’n Estona a neia,

¹² Ama hin nâipasal inthum, Bethrafa, Pasea, Tehina a nei hai, Tehina hi Nahas khua indingtu a ni. Hi irchihai hi Reka khuaa om an ni.

¹³ Kenaza khan nâipasal inhni, Othniela le Seraia a neia. Othniela hin nâipasal hni, Hathata le Meonothaia a neia.

¹⁴ Meonothaia hin Ofra a neia, Seraia hin Joaba a nei a ni. Hitaka omhai hi kut theithiam inzen omkhôm an ni.

¹⁵ Jefunea nâipa Kaleba’n nâipasal thum, Irua, Ela, le Naama hai a neia. Ela hin Kenaza a neia.

¹⁶ Jehalela nâipasal minli, Zifa, Zifaia, Tiria le Asarela hai a neihai.

¹⁷ Ezra’n nâi minli Jethera, Mereda, Efera le Jalona a neia. Mereda hin Aigupta rêng nâinu Bithiaii dôngma’n a neia, nâinupang inkhat Miriami leh nâipasal inhni Samaia le Isba a neia, Isba hi Estemo khua indingtirtu a ni.

¹⁸ Mereda hin Juda nama mi dôngma’n a neia, nâipasal inthum Jereda, Hebera le Jekuthiela a neihai, Jereda hi Gedor khua indingtirtu a ni, Hebera hi Soko khua indingtirtu a ni; Jekuthiela hi Zano khua indingtirtu a ni.

¹⁹ Hodia hin Nahama farnu dôngma’n a neia, an nâihai chu Keila khua Garm hai le Estamo khuaa om Maaka hai irchibul a ni.

²⁰ Simona hin nâipasal minli Amnona, Rina, Benhanana le Tilona a neia. Isia hin Zoheta le Benzoheta a neia.

Sela irchihai

²¹ Juda nâi Sela irchihai chu hihai hi an ni. Era, Leka khua indingtirtu; Laada chu Maresa khua indingtirtu a ni; a’rchihai chu Beth Asbe khua omhai hi an ni, Ladek mi an ni.

²² Jokima Kozeba khuaa omhai leh hin; Joasa le Sarafa a nei. Moab dôngmate dôngma’n a neia. Bethlehem khuaa an om ta. (Hi thurchi hi tianlaia irchi irsuina ata lâk a ni.)

²³ Reng ihmanghai bêl vuak mi an nia, Netaim le Gedera khuaa om an ni.

Simeona irchihai

²⁴ Simeona nâipasal ringa, Nemuela, Jamina, Jariba, Zera le Saula hai an ni.

²⁵ Saula hin Saluma a neia, ama hin Mibsama a neia, Mibsama hin Misma a neia,

²⁶ Misma hin Hamuela a neia, ama hin Zakura a neia, Zakura hin Simeia a neia,

²⁷ Simeia hin nâipasal sômhleiruk le nupang kiruk a neia, khannisian a urêng danghaiin chu nâi nei intam mahai; Simeona irchihai chu Juda irchihai angin pung thei mahai.

²⁸ Davida inlal zoro dên khan chu Simeona irchi hi Beerseba, Molada, Hazarsuala,

²⁹ Bilha-ah, Ezem-ah, Tolad-ah,

³⁰ Bethuel-ah, Horma-ah, Ziklag-ah,

³¹ Beth-markabot-ah, Hazarsusim-ah, Bethberi-ah, Saaraim khuahaia an om ngai.

³² Etam haia, Ain haia, Rimon haia, Token haia, Asan khuahai le

³³ a kôlvêl khua Baalath khua sim tianga tâng an omna a ni. An sûngkua thurchi le an omna hmunhai irziakna lekhabua an nam hruaituhai chu hihai hi an ni.

³⁴ Mesobaba, Jamleka, Amazia, nâipa Josa,

³⁵ Joela, Jehua, (Jehua hi Josibia nâi a ni, a pu chu Asiela nâi Seraia a ni).

³⁶ Elioenaia, Jakoba, Jesohaia, Asaia, Adiela, Jesimiela, Benaia,

³⁷ Ziza, Ziza hi Sifia nâi a ni; kha pa kha Alona nâi a ni; Alona hi Jedaia nâi a ni, a pa chu Semaia nâi Simria a ni.

³⁸ Hihai irchi hi an pung hrât tak taka.

³⁹ Nitâk tianga Gerar dênin an indarh zoia, kha khua omna irhôr kho nisua tianghai khom kêlbelra an insuahai a ni. Ram ôl lian, hloisûl satna hmun, ram hrisêl irtharngamna tamtak an hmu a ni. Hihai lai hin Hama hai an om ngai a ni.

⁴⁰ Judai ram rêng Hezekia zoro lai khan annihai khi Gerar-a an fea, khataka lei omhai puan in le bokrop neihai an insiatpai pehaia. An belra satna hrangin hloisûl a sa pehai hrai sikin, kha hmuna lei omhai kha an inhnotpaihaia, anni’n an iluapai a ni ta.

⁴¹ Isia nâi Pelatia, Nearia, Refaia le Uziela haiin Simeona irchihai laia mi irzaringa chu nisua tiang Edom rama an fea.

⁴² Amalek leh omhai chu an thathaia, atûn ten hin an iom ta a ni.

⁴³ Khan, Amalek mi rothai a la om sunhai kha an thata, an hmuna khan a vuan sûn ten hin an la om a ni.