1 THURCHI SUINA 2 - PATHIAN LEKHABU IRTHIANG C.L. Bible (BSI)

Juda Irchihai

¹ Jakoba’n Reubena, Simeona, Levi, Juda, Isakara, Zebulun,

² Dana, Josefa, Benjamina, Naftalia, Gada le Asera a neihaia.

³ Juda hin nâipasal ringa a nei; Kanaan nupang Batsuii leh nâi inthum Era, Onam le Sela a neihai. A nâilutîr tak Era hi a sual hrai sikin Rengpa’n a thatpaia.

⁴ A moinu Tamari leh nâi inhni Pereza le Zera a neihai sa.

⁵ Pereza hin Hezrona leh Hamula a neihaia.

⁶ Zera hin nâipasal ringa; Zimria, Ethana, Hemana, Kalkola le Dara hai an ni.

⁷ Zera irchi laia mi Karmia nâi Akhara hin Pathian ta hranga ser ir-uptir hlat a tum tâk sikin Israelhaiin an lei tuanga.

⁸ Ethana hin Azaria a inei a ni.

Reng Davida Irchihai

⁹ Hezrona hin nâi inthum Jerameela, Rama, le Kelubaia a neia.

¹⁰ Rama hin Aminadaba a neia. Ama hin Juda nam laia mi roiinpui tak Nasona a neia.

¹¹ Nasona hin Salmona a neia, ama hin Boaza a neia.

¹² Boaza nâi chu Obeda a ni, Jesaia neitu a ni.

¹³ Jesaia hin nâipasal sari a neia; a ulian dônin Eliaba, Abinadaba Simea,

¹⁴ Nathanaela, Radaia,

¹⁵ Ozema, Davida.

¹⁶ An farnuhai chu Zeruii le Abigaili an ni. Zeruii hin nâipasal inthum Abisaia, Joaba, Asahela hai an ni.

¹⁷ Abigaili hin Amasa a neia, a pasal chu Ismaela irchia mi Jethera a ni.

Hezrona Irchihai

¹⁸ Khan, Hezrona nâipa Kaleba’n a dôngma Azubi, Jeriotha nâinu ata khan nâi a neihaia; Khan, hihai hi a nâipahai chu an ni: Jesera, Sobaba le Ardona.

¹⁹ Azubi thi zoiin Kaleba’n Efrati dôngma’n a nei nôka, nâipasal Hura an neia.

²⁰ Hura’n Uria a neia, ama hin Bezalela a nei nôka.

²¹ Kum sômruk a niin Hezrona’n Makira nâinu Gilead farnu dôngma’n a neia. Nâipasal Seguba an neia.

²² Seguba khan Jaira a neia, hi mi hi Gilead rama khua sômhni inthum chunga rêng a ni.

²³ Gesur hai le Amor haiin kha hmuna ram, khua sômruk kha an lâka, Jair le Kana khua le a kôlvêlhai chu an lâka. Kha khuaa omhai kha chu Gilead-a le Makira irchihai an ni.

²⁴ Hezrona chu a thia, a nâipa Kaleba’n a pa dôngma a ithisan Efrati chu dôngma’n a neia, nâipasal Asura an neia, ama hi Tekoa khua indingtu masatu kha a ni.

Jerameela Irchihai

²⁵ Hezrona nâipa ulian tak Jerameela’n nâipasal ringa a neia, a uliantak chu Rama a ni, a danghai chu Buna, Orena, Ozema le Ahija hai an ni.

²⁶ Rama hin nâipasal inthum Maaza, Jamina le Ekera hai an ni.

²⁷ Jerameela hin dôngma dang Atari a neia, nâipasal Onam an neia.

²⁸ Onam hin nâipasal inhni Samaia le Jada a neia. Samaia khom hin nâi inhni, Nadaba le Abisura a neia

²⁹ Abisura hin dôngma Abihaili a neia, nâi inhni Abana le Molida an neia.

³⁰ Abisura upa Nadaba khom hin nâipasal inhni Seleda le Apaima a neia, Seleda chu nâi nei loiin a thia.

³¹ Apaima’n Isia a neia, Isia’n Sesana, Sesana khan Ahlaia a neia;

³² Samaia sangpa Jada’n nâipasal inhni Jethera le Jonathana a neia, Jethera chu nâi nei loiin a thia,

³³ Jonathana’n nâipasal inhni Peleta le Zaza a neia. Hihai hi Jerameela irchihai chu an ni.

³⁴ Sesana hin nâipasal nei maka, nâinupang vai a nei a ni. Siahlo Aigupta mi Jarha an neia,

³⁵ Ama hi a nâinu an luatira, nâipasal Ataia an nei.

³⁶ Ataia hin Nathana a neia, ama hin Zabada a nei a ni.

³⁷ Zabada hin Eflala a neia, ama hin Obeda a neia.

³⁸ Obeda hin Jehua a neia, Jehua’n Azaria a neia,

³⁹ Azaria hin Heleza a neia, ama hin Eliasa a neia.

⁴⁰ Eliasa hin Sismaia a neia, ama hin Saluma a neia.

⁴¹ Saluma hin Jekamia a neia, ama hin Elisama a nei a ni.

Kaleba Irchihai

⁴² Jerameela upa Kaleba nâi ulian tak chu Mesa a ni, Zifa irchibul chu a nia. Zifa hin Maresa a neia, ama hin Hebron a neia.

⁴³ Hebronin nâipasal minli, Tepua, Kora, Rekema, le Sema hi an neia.

⁴⁴ Sema chu Rahama pa a ni, Rahama hin Jorkeama a neia, Sema upa Rekema’n Samaia a neia.

⁴⁵ Ama hin Maona a neia, Maona hin Bethzura a neia.

⁴⁶ Kaleba’n chu lâksîr Efaii a luaa, ama leh hin nâi inthum, Haran, Moza, Gazeza hai an nei a ni. Haran khom hin nâipasal Gezeza ngêt a phua nôk a ni.

⁴⁷ Mi inkhat Jadaii khan nâipasal kiruk, Regema, Jothama, Gesana, Pelet, Efa le Saafa hai hi an neia.

⁴⁸ Kaleba hin lâksîr dang Maaki a nei nôka, nâipasal inhni, Sebera le Tirhana a neipuia.

⁴⁹ Zoro sôtvit hnunga nâi inhni Saafa le Seva a neipui nôka, Saafa hi Madmana khua indingtirtu a nia, Seva hi Makbena le Gibea khua chuan masatu a ni. Kaleba’n nâinupang Aksaii a nei a ni.

⁵⁰ Hi mihai khom hi Kaleba irchi an ni; Kaleba le Efrati nâi ulian tak chu Hura a ni. Hura nâipasal Sobala chu Kiriath-jearim khua indingtu a ni.

⁵¹ A nâipa Salma chu Bethlehem khua indingtu a ni, a nâi mi tumtak Harefa chu Bethgadar khua indingtu a ni.

⁵² Kiriath-jearim indingtu Sobala chu Haroe le Menuhot-ah omhai a chimriphai irchibul a ni.

⁵³ Kiriath-jearim-ah omhai Ithra hai Put hai, Sumat hai le Misra hai irchi a ni sa. Zera le Estaol khuaa omhai khom, hihai hi an irchi suanpâr a ni sa.

⁵⁴ Bethlehem khua indingtu Salma chu Netofat, Atrot-beth-Joab khuaa omhai irchi sûnga mi a ni. Manahat-ah om a chimriphai dôr chu Zor-hai irchi sûnga mi an ni.

⁵⁵ Lekha irziak mi, Jabez khuaa om Tirat-hai, Simeat-hai, Sukat-hai le Kenhai leh hin irchi khata mi an nia, Rekab-hai leh hin an irneipol a ni.