1 THESALONIKA 3 - PATHIAN LEKHABU IRTHIANG C.L. Bible (BSI)

¹ Nin thurchi inhre loia om kin thei ta no sikin keini vai hi Atheni khuaa la om inlân sa kin tia.

² Khanchu, kin urêngpa Timothea, Krista Thurchi Sa hrila Pathian sin kin ithopui hi nin iamna indet hrang le,

³ hi dengintheinahai sika nin laia mi tukhom nin inhnîng loina hrangin nangni inthor hrangin kin hong itîr a ni. Nangni khomin hi hi nei ngêt hrang a nih ti nin inhriat kha.

⁴ Nin kuang kin om lai khan dengintheina ei ituang hrang tih nangni kin lei ihril a ni. Khaang ngêt khan a hong tung ta ti nin inhriat.

⁵ Iamnaa nin det mai le det mai loi inhre loia om kin thei ta no sikin, Timothea kha kin hong itîr a ni, inthêmtu’n inthêmpai hrangin kin sin sôlna chanlamboi a chang thei itinin tia kin hong itîr a ni.

⁶ Timothea chu nin kuang ata a hong kîr nôk tâka, thurchi raifânom tak, nin iiam indetziahai, lungthungna nin inei intamzia hai, keini’n nangni hmu kin irzuk tak tak angin nangni khomin nin irzuk thu hai, itiklai khomin nin ni inhriat mai a ni tihai nin ni hrila.

⁷ Khasika khan, urênghaio, nin iamna a det sikin kin lunginzîngna le kin intakna murdia irtharngam takin kin om thei ta a ni.

⁸ Rengpaa nin det mai sika hin atûn chu kin ta hrangin kin hringna hi ar fêna a om ta.

⁹ Nangni zâra Pathian makunga kin raifânna murdi sika hin a kuang lômthu hril thei inlân o!

¹⁰ Nin hmêl kin hmu theina hrang le iamna nin irsam kin thuan theina hrangin Pathian kuang, sûn le zân ngûk takin kin zong ngai a ni.

¹¹ Ei Pa Pathian ngei le ei Rengpa Jisua khan nin kuang kin hongna hrang lam ni siam pe ri se.

¹² Lung nangni kin ithung nêka irkhêlin lung nin irthung theina hrang le mi murdi lung nin thung theina hrangin, nin lungthungna kha Rengpa’n inpungtirin nangni inpuang pe ri se.

¹³ Khanchu ei Rengpa Jisua khan a mi’rthianghai murdi leh a zuang tika, Pathian ei Pa makunga khan irthiang le sêlna boia a om theina hrangin nin milung indet ri se.