1 SAMUELA 29 - PATHIAN LEKHABU IRTHIANG C.L. Bible (BSI)

Filistia mihaiin Davida an hnôl

¹ Filistia mihai le an sipaihai chu Afek-ah an irbûm vinga; Israel mihai khan Jezreel phâia tuipui kôla omhmun an khuara.

² Filistia-hai rêng ringahai kha an sipai irzakhat vêlin, sâng têlin an irkôi zun zuna, Davida le a mihai chu Akisa leh inhnung an intaa.

³ Filistia sipai hruaituhai khan an hmua, “Hi Hebraihai hin imo an itho?,” an tia. Akisa khan, Filistia hruaituhai kuang khan, “Ama hi Davida, Israelhai rêng Saula mi lian a ni, zoro sôttak ki kuang a om tâka. Ki kuang a hor bei ata atûn ten khom hin a sualna ite ki la ihmu loi a ni,” a tia.

⁴ Khannisianlân, Filistia hruaituhai kha Akisa chunga an ning an mura, a kuang, “Kha mi kha chu khua ni ipêkna khan tîrpai nôk ta ro, irdoina hmuna keini kôla chu hong no ri se. khano’nchu irdoina hmuna khan ei râlhai tiang kop duaina a ti, a pu le irngei nôkna hrangin ei mihriamhai lu lana a ti.

⁵ Hi Davida hi ni ma mo, nupanghaiin lâm puma ‘Saula’n a sâng sângin a thata, Davida’n a sîng a sîng,’ tia hla an isak kha?,” a tia.

⁶ Kha hnung chu Akisa khan Davida kha a koia, a kuang, “Israelhai Pathian hringna irhmingin ki iti a ni, mi diktak ni nia, sipaihai laia ki kuang ni fea, irdoina ni ni doipuia, ki inuam a ni. Ki kuang ni zuang nî ata, a vuan sûn ten hin ni chunga ite saloina la hmu viat ma ung. Khannisian rêng danghai hin nang an ipom loi a ni.

⁷ Khasikin Filistia-haiin an milung a chuk theina hrangin kîr nôkin lân, milungchuk takin fe ro,” a tia.

⁸ Davida khan Akisa kuang, “Ka pu imo ki itho insual tâk? ni iti lam angin, ni kuang ki om sûng kârka ki tho insualna ni hmu no’n te, i lo hrangin mo ka pu le rêng râlhai kha doi loiin ki ikîr nôk hrang?,” a tia.

⁹ Akisa’n Davida kuang, “A dik, ki mithmua khan Pathian vântirtôn ang dôrin ni isa a ni. Khannisianlân Filistia rêng danghaiin, ‘Irdoina hmuna kin kuang hong sa no ri se,’ an tia.

¹⁰ Khasika khan ni kuanga hong sa ni pu Saula zuituhai leh hin zînga thoi unglân, khua a vâr le nin irot hrang a ni,” a tia.

¹¹ Khanchu Davida le a mihai kha Filistia rama kîr nôk hrangin zîng taka an suaka, Filistia mihai chu Jezreel-a an fe tâka.