1 SAMUELA 24 - PATHIAN LEKHABU IRTHIANG C.L. Bible (BSI)

Davida’n Saula hringna a hôi

¹ Saula hin Filistia mihai a va irzûlhai zoiin chu, “Davida chu Engedi ramchâra a om,” ti an hrila.

² Khanchu Saula khan Israel mi murdihai lai ata sipai sa inthangsuak, mi sângthum a hruaihaia, sarza lêngna ngai lungpui bil tiang khan Davida le a mihai zongin an fe tâka.

³ Khan lam laia khan kêlbelra irkul, rôl omna hi a va dêna, Saula chu irngam viat hrangin a va lûta. Kha khan Davida le a mihai kha rôl sûngrîl tiang khan an oma.

⁴ Davida mihai khan, Davida kuang, “Irngai ro, Rengpa’n ni kuang ni râl kha nang pe ki ta, a chunga sa ni iti lam ang takin tho ni ti, a iti sûn kha a ni ta,” an tia. Khanchu Davida kha a thoia, dâihrekin Saula puanhmor kha a va ât tana.

⁵ Khannisianlân nakana chu Saula puanhmor a va i-ât khan Davida lungrîl a na pe oka.

⁶ Khanchu a mihai kuang khan, “Rengpa sahriak irthu ki rêngpa chunga kut thâk loi hrangin Rengpa’n nin omtir ri se. Ama kha Rengpa sahriak irthutir a ni sikin a chunga kut ki thâk loina hrangin,” a tia.

⁷ Khanchu Davida’n kha thua khan a mihai a khapa, Saula va doi hrang kha phal pehai ta maka. Saula kha rôl ata kha a suaka, a fe nôk ta.

⁸ Kha hnung chu Davida khan a zuia, “Rengpa, ki rêngpa,” tiin Saula kha an sama. Saula a hor heiin chu Davida khan a hmâi irnêng sikin chubai a mûka.

⁹ Davida khan Saula kuang, “Irngai ro, Davida’n ni siatna hrang a izong a nih itia mihaiin ni kuanga an insîr kha itho mo tak ni isôn ngai?

¹⁰ En ro, a vuan hin Rengpa’n rôl sûnga kin kuta nang a inhlan lam hi ni mitin ni hmu theia, ki mi senkhathai khan chu, nang that hrangin an ni tîra, khannisian ki Rengpa sahriak irthûtir ni nih sikin nang ki la ihôi a ni.

¹¹ Kha vai kha ni loiin, ka pa en ro, hi ni puanhmor ki ichôi chian a ni. Nang ki ithat thei a nia, khannisianlân, hi nêka hin ni puanhmor ki i-ât a ni. Hi hin thil saloi le tho’nchâina om mah ti le ki hringna la hrangin ni zong mai khomin lân, ni chunga ite sual ma ung ti hi inhre suak ngêt ro.

¹² Rengpa’n nangma le ei chungchâng chu rêl ri se, Rengpa khan ki chunga ni thil tho hin kuttum nan tuangtir ri se. Khannisian keima’n chu ni chunga kut zel tha viat no ning.

¹³ Tianlaia thuvârin, ‘Mi suala irthokin sual a hong suak ngai,’ iti khom nin hriata. Khasika khan ni chunga kut tha no ning.

¹⁴ Israel rêng kha tu zonga zuang suak mo a ini? Tu ngân mo a irzûl? Ui thi sai, uihrikte kha!

¹⁵ Rengpa khan rêl sianlân, tu khôk mo a dik loi ei ini infel ri se. Thu kha ngaitua sianlân, ni thop sianlân, ni kut ata ni sansuak ri se,” a tia.

¹⁶ Davida’n Saula kuang hi thu hi a ti zoiin chu, Saula khan, “Nangma ni nina, ki nâipa Davida?” a tia. Saula chu a chap ngûk ngûk tâka.

¹⁷ Kha hnung chu Davida kuang khan, “Nangma ni dika, keima ki idik loi a ni, nangin chu ki chunga thil sa ni thoa, keima’n chu thil saloi ni chunga ki itho a ni.

¹⁸ A vuan hin ki chunga thil sa ni thozia ni inlangtir a ni; Rengpa’n ni kuta a ni pêk khoma ni ni ithat loina hin.

¹⁹ Mi’n râl hmu sianlân, a la insua hrang ma ni? Khasikin a vuana ki chunga ni thil tho hin Rengpa’n thil sain nang thuan ri se.

²⁰ Irngai ro, atûn hin Israelhai rêng la ni ngêt ni ta, ni roirêlna hnuaia ram chu inding mai a ti, iti kin hriat suak ta.

²¹ Khasikin ka pa insûngkua irhming irhmang phara a om loina hrangin ki hnunga ki’rchihai hôihai hrangin Rengpa irhmingin chonginkung ro,” a tia.

²² Khaang khan Davida khan Saula kuang chong an kunga, kha hnung chu Saula kha a in tiang a kîr tâka, Davida le a mihai chu an irbîkna ngai hmuna khan an fe nôk ta.