1 RÊNGHAI 6 - PATHIAN LEKHABU IRTHIANG C.L. Bible (BSI)

Solomona tempil sin phutna

¹ Israel nâihaiin Aigupta an suaksan rengata kum irzaminli sômriat, Israel rêng Solomona kum minli tha hnina, Ziv thaa chu Solomona’n Rengpa tempil sin a phuta.

² Solomona’n Rengpa ta hranga a tempil sin chu, a dung mûk sômruk, a khang mûk sômhni, ar sâng lam chu mûk sômthum a ni.

³ Tempil hmun irthiang maton tiang sum hrêna pûk a’rzat lam mûk sômhni le an thûk lam mûk sômin, a siama.

⁴ Tempil banga chu tukver chîntehai ar ônga

⁵ tempil banga bê theiin chontan irchuan thumin a sina,

⁶ ar hnuai tak chu mûk ringaa lian a nia, a lâi chu mûk ruk, a’rsâng tak chu mûk saria lian a ni. Tempil chontan irsâng tak bang chu a hnuai tiangahai nêkin a’rphântira.

⁷ Tempil sinna hranghai chu lung lâkna hmun sinsiam sai a ni sikin tempil sin lai chu sûna khom thîrhêm irhâi ite inhriat hrang om ngai mah.

⁸ In sûng ar hnuai tak lûtna chu tempil sim tianga irngha a nia, chontan, inhni le inthumna fena hrangin leidâk a doa.

⁹ Khaang khan tempil chu a siam zoi ta, a sûng tiang chu sidar thing âtin a tuama.

¹⁰ Tempil bang hnenga tentan siamhai chu mûk ringa zitin a siama; hmun tina sidar thing tângkhangin a hmanghai vinga.

¹¹ Rengpa thu chu Solomona kuang a zuang tunga.

¹² “Atûn tempil chu ni sin zoi tâka, ki dân le ki thu nan hriattir ni’rngaisânga, ki thupêkhai ni zômin chu ni pa Davida kuanga ki thu inkunghai chu nangma chunga intung ki ti.

¹³ Israelhai laia om ki ta, ki mi Israelhai chu masanhai no ning,” a tia.

¹⁴ Khan, Solomona’n tempil chu a sin zoi tâka.

Tempil sûng irvotir dân

¹⁵ Tempil sûnga bang epna’n sidar thing a hmanga, a hnuai ata a chung dênin, thing ât phêk ar bel vinga; a hnuai tiang meisâr thing a dâpa.

¹⁶ Chontan, lailung, hmun irthiang taka khan chu tempil lian dân chu mûk sômhnia irvêl irkualin a siama, a hnuai ata a chung dênin sidar thing leh a tuamhai chita;

¹⁷ Hmun irthiang tak lûtna hrang tôna tentan chu mûk sômminlia sei a nia.

¹⁸ Tempil sûng irvotirna sidar thing banghaia khan, pâr dûr irlimhai siamin sidar thinghai chu sip khakin a lung hmang irlangtir loiin a’rvoa.

¹⁹ Tempil sûng lailung chu Rengpa Thuthung Bôm siana hrangin a siama.

²⁰ Kha sûng kha chu mûk sômhnia irleng irkualin, ar sâng lam khom mûk sômhni ngêtin a siama. A sûng chu rângachakin a tuama. Sidar thinga siam maichâm khom kha rângachakin a tuam dela.

²¹ Solomona’n tempil sûng chu rângachakin a tuam del zita, chontan lailung tak lûtna mikot lua khan chu rângachak thîrhrui an khâia, a mikothai khom rângachaka tuam a ni.

²² Tempil sûng murdi le hmun irthiang taka maichâm om khom kha rângachaka tuam ving a ni.

²³ Hmun irthiang taka khan oliv thinga siam cherub irlim mitha inhni nei mûk sôma irsâng inhni a oma.

²⁴ Cherub inkhat mitha chu mûk ringaa sei a ni, a mitha inhni’n ar anga, a mitha inkhat leh ar kâr lam chu mûk sôma irhla a ni.

²⁵ Cherubhai chu irang zekin an lian lamhai khom an hmêl khom a nia.

²⁶ Mûk sôma irsâng an nia.

²⁷ Tempil sûng hmun irthiang taka khan cherubhai chu a siahaia, mithahai phar pumin. Cherub mitha inhni chu a laia irsuktirin, cherub inkhat mitha le tianga hmora khan bang dang an suntira.

²⁸ Kha cherubhai khom kha rângachaka tuam ving an ni.

²⁹ Tempil sûng tianga banghai le hmun irthiang tak banghai chu cherub irlim hai, tûm thing irlimhai le pâr irlimhaiin a’rvotira.

³⁰ Hmun irthiang tak hnuai le a danghai khom kha rângachakin a tuamhai vinga.

³¹ Hmun irthiang tak lûtna mikot chu oliv thinga siam a ni, inkhâr lu chungsîp irzum a ni.

³² Oliv thingin inkhâr inhni a siama, cherub irlimhai, tûm thing irlim hai le pâr irlimhai sinin rângachakin a tuamhaia.

³³ Tempil sûng lûtnaa khan mikot kil minli nei, irki minlia ir-ông vingin oliv thingin a siama.

³⁴ Mikot thep thei inhni meisâr thingin a siama.

³⁵ Khahai khom khan cherub mitha nei irlim, tûm thing irlim le pâr irlimhaia irvoin rângachak leh a tuamhaia.

³⁶ Tempil hnuai tiang khan tual lian takin a siama, lung sinsai irkhamin chontan inthumin a tentana, sidar thing phêk leh a’rkula.

³⁷ Solomona inlal zoro kum minlinaa Ziv tha tempila lung an iphûm a nia.

³⁸ Solomona inlal kum sômhleikhatna le tha riat bul, thaa chu ki iti angin tempil chu sin zoi a ni ta a ni. Kum saria sin zoi a ni.