1 KORINTH 13 - PATHIAN LEKHABU IRTHIANG C.L. Bible (BSI)

Lungthungna

¹ Mihriam chonghai le vân vântîrtôn chonghaiin thu insîr thei khom inlân, lungthungna ki nei no’n chu, dâr inring mai mai mani, têngrep inbên irhâi mai mai mani ni ki ti. ti.

² Khabana, thu’nsîr theina neiin, thu’rthup murdi inhriattheina le inhriatna murdi nei khom inlân, lungthungna ki nei no’n chu ite ni no ning.

³ Inrianghai infâna hrangin ki nei murdi pe vingin, ki takpum tena khom kâng hrangin irpe khom inlân, lungthungna ki nei no’n chu ki ta hrangin ite ar fêna om no ni.

⁴ Lungthungna chu a tuang theia, khonzâna a neia; hnarsa ngai maka, lârirpâk maka, irsong ngai maka,

⁵ Lungthungna chu om insual ngai maka, mâni hranga sa zong ngai mah, a ninginmur nuam ngai maka; sual insâp ngai mah;

⁶ lungthungna’n chu felloina lôm ngai maka, thutak a lôm ngai.

⁷ Lungthungna’n chu a tuang zâm zâma, a iamna hai, a tuangnahai le a tuangtheina hai hlosam viat ngai mah.

⁸ Lungthungna chu itiklai khom boi no ni. Thu’nsîrna hi om khom sian inmongtir la ni a ti, chong inhriat loihai hi om khomsian la mong an ti; inhriatna hi om khomsian la boi a ti.

⁹ Irkip loiin, ei inhriata irkip loiin thu ei insîr ngai a ni;

¹⁰ ar kipa zuang tung tika chu ar kip loi hi boi ta a ti.

¹¹ Ki nâiinpang lai khan nâipang chongin ki chonga, nâipang lungrîl ki’rputa, nâipang ngaitua lam angin thil ki ngaitua ngai; ki hong puihlingin chu nâipang tho lam kha ki mâk ta.

¹² Atûn chu hlîmena inlang rêi ruai ang dênin ki’rhmua, nakana chu hmâi irtongin hmu ta ei ti. Atûn chu a chimrip vai ei inhriata, nakana chu Pathianin nin inhriat infel ang hin lan hriat infel ei ti.

¹³ Khanchu hi thil inthum iamna hai, sabeina hai le lungthungna hai hi om mai a ti, an laia a poimo tak chu lungthungna hi a ni.