Zabur 98 - Hodáay Pákén Ketáb Balochi zobáná

Nókén sawté bejanét

Zaburé.

¹ Pa Hodáwandá nókén sawté bejanét, ke ajabén kári kortag, áiay rástén dast o pákén báská sób o pérózi katthetag.

² Hodáwandá hamá neját pésh dáshtag ke cha áiay némagá ent, wati adli kawmáni chammán paddar kortag.

³ Áiá pa Esráilay óbádagán wati mehr o wapa yátá áwortag, zeminay sajjahén goddhi hadd o simsarán, may Hodáay dátagén neját distag.

⁴ Oo sajjahén zemin! Pa Hodáwandá shádmániay kukkárá borz kan. Kukkár kanét, pa shádehi sawt bejanét, benázénét.

⁵ Pa Hodáwandá chang o sáz bejanét, gón sázá sawt bejanét.

⁶ Gón sorná o gwarándhay kánthá bádsháhén Hodáwanday bárgáhá, shádehiay kukkárá chest kanét.

⁷ Daryá o daryáay tahay sajjahén chizz grandátant, jahán o áiay sajjahén jahmenend.

⁸ Kawr cháp bejanátant o kóh pa shádmáni sawt,

⁹ Hodáwanday bárgáhá sawt bejanátant, ke á pa zeminay dadrasiá kayt. Á jaháná pa adl dádrasia kant o kawmán pa ensáp.