Zabur 96 - Hodáay Pákén Ketáb Balochi zobáná

Ásmán shádehi bekanát o zemin gal bát

¹ Pa Hodáwandá nókén sawté bejanét. Oo sajjahén zemin! Hodáwandá benázén.

² Hodáwandá benázénét, áiay námá satá kanét. Har róch hamá nejátay járá bejanét ke cha áiay némagá ent.

³ Kawmáni nyámá áiay shán o shawkatay járá bejanét, sajjahén kawmáni nyámá áiay ajabén káráni.

⁴ Ke Hodáwand mazan ent o satáyáni láhek, cha sajjahén “hodáyán” bákamálter ent.

⁵ Kawmáni sajjahén “hodá” náudagén bot ant, bale Hodáwandá ásmán jórh kortant.

⁶ Ezzat o shán hamáiay chapp o chágerdá ent o kodrat o zébái áiay pákén bárgáhá.

⁷ Oo kawmáni kabilahán! Hodáwandá benázénét, Hodáwanday shán o kodratá benázénét.

⁸ Hodáwanday námay mazaniá benázénét, korbánig byárét o áiay bárgáhá byáét.

⁹ Cha Hodáwanday pákiay zébáiá, áiay démá kóndhán bekapét. Oo sajjahén zemin! Áiay dargáhá belarz.

¹⁰ Sajjahén kawmáni nyámá begwashét: “Hodáwand bádsháh ent.” Jahán pa mohkami jórh kanag butag o nasorit, á, kawmáni dadrasiá pa ensápa kant.

¹¹ Ásmán shádehi bekanát o zemin gal bát, daryá o harché ke daryáyá mán, pa borztawári áiá benázénátant.

¹² Dhagár o harché ke dhagárá hast gal bátant, jangalay sajjahén drachk pa shádmáni áiá benázénátant.

¹³ Hodáwandá benázénátant, chiá ke á kayt, haw, pa zeminay dadrasiá kayt. Jahánay dadrasiá pa adl o ensápa kant o kawmáni dadrasiá wati rásti o tachkiay hesábá.