Zabur 76 - Hodáay Pákén Ketáb Balochi zobáná

Hodáay démá kay óshtáta kant?

Pa sázger o washáwázáni sálárá. Gón simmi sázán. Asápay zabur. Sawté.

¹ Yahudiahá Hodá zánag o pajjáh áraga bit, Esráilá áiay nám mazan ent.

² Áiay tambu Shalimá ent o menendjáh, Sahyuná.

³ Ásgwárén tiri hamódá próshtant, zahm o espar ham, ke jangi seláh ant. Ósht...

⁴ Taw drapshán ay o shawkat o shánet, cha á kóhestagán zébáter ent ke shekárá porr ant.

⁵ Delér áwár janag butant, wati goddhi wábá ant, cha jangáwarán yakké ham namant ke dasté besorénit.

⁶ Oo Ákubay Hodá! Cha tai neherrán, áyáni arrábah o aspán sar pa markay wábá dát.

⁷ Taw bákamál ay, wahdé hezhma geray, kay tai démá óshtáta kant?

^8-9 Taw cha ásmáná dádrasia kanay o wahdé taw, oo Hodá, pa dadrasiá jáha janay ke zeminay sajjahén setam distagénán neját bedayay, zemin cha torsá chopp o bétawára bit. Ósht...

¹⁰ Pa ensáná tai hezhm ham tai satáay sawaba bit o pasht kaptagén hezhmá taw wati lánká banday.

¹¹ Gón wati Hodáwandén Hodáyá kawl bekanét o wati zobánay sará bóshtét, á sajjahén ke kerr o gwarán ant pa hamáiá théki byárant ke bákamál ent.

¹² Á hákemáni gorurána próshit, zeminay bádsháh cha áiá torsant.