Zabur 74 - Hodáay Pákén Ketáb Balochi zobáná

Oo Hodá! Chiá márá yalah dátaget?

Asápay shayri gwashtánk.

¹ Oo Hodá! Chiá márá tán abad yalah dátaget? Pa ché tai hezhmay ás pa tai charágáhay pasán rók ent?

² Wati kawmay yátá bekap, ke taw cha dérén zamánagán pa bahá zortagatant, ke taw móketagant tán tai kawm o mirás bebant. Sahyunay kóhay hayálá bekap ke ódá jahmenend butagay.

³ Wati gámán dém pa wati hamé modámigén wayránagán betarrén, chiá ke dozhmená har chizz bérán kortag ke tai pákén jágahá butag.

⁴ Dozhmenán tai didárjáhay tahá gorret o wati bayrak pa neshániá mekk kortant.

⁵ Hamáyáni paymá atant ke wati taparán jangalay drachkáni sará borza barant.

⁶ Áyán, tai pákén jágahay sajjahén ájetagén dár gón wati tapar o téshagán prósht o hurt kortant.

⁷ Tai pákén jágahesh ás kasshet o hák o por kort, tai námay menendjáhesh palit kort.

⁸ Wati delá gwashtesh: “Áyán sarjamiá wati panjagay chérá kárén,” gorhá Hodáay sajjahén didárjáhesh é sardhagárá sótkant.

⁹ Nun hech neshánié nagendagá én, hech nabié pasht nakaptag o cha má kass ham nazánt ke tán kadén é paymá bit.

¹⁰ Oo Hodá! Tán kadén dozhmen tai sará bekandit? Dozhmen tán abad tai námá bad o rad bekant?

¹¹ Chiá wati dastá poshtá dáray, wati rástén dastá? Dastá pach kan o pa áyán gári o tabáhié byár.

¹² Bale Hodá cha dérén zamánagán mani bádsháh ent, ke zeminay sará nejátbakshén kára kant.

¹³ É taw atay ke daryáet gón wati zór o wáká do ném kort o daryáay baláháni saret ápáni nyámá próshtant,

¹⁴ Liwyátánay saret próshtant o gyábánay sahdáráni waráket kort.

¹⁵ Jó o sarchammag, taw rombént o rawán kortant, modámigén kawr, taw hoshk kortant.

¹⁶ Róch taig ent o shap ham tai máh o róch taw barjáh dáshtagant.

¹⁷ É taw atay ke zeminay hand o simsaret gisshéntant, garmág o zemestánay addh kanók taw ay.

¹⁸ Oo Hodáwand! Yátá bekap ke dozhmen che paymá maskará kanant o názántén mardom tai námá che paymá bad o rada gwashant.

¹⁹ Wati kapótá rastaráni warák makan o setam distagén kawmay zendá tán abad mashamósh.

²⁰ Wati bastagén ahdá bedár, chiá ke é sardhagáray tahárén jágah cha zolm o zóray kodóh o kodámá porr ant.

²¹ Mayl ke pádmálén mardom gón roswái pad bekenzant, setam distag o hájatmand tai námá satá bekanátant.

²² Oo Hodá! Jáh jan o wati hakkay démpániá bekan, yátá bekap ke názánt sajjahén róchá che paymá tai sará kandant.

²³ Wati dozhmenáni kukkárán mashamósh, dozhmenáni shóreshá ke modám borzád ent.