Zabur 34 - Hodáay Pákén Ketáb Balochi zobáná

Hodáwanday nékiá bechashét

Dáuday Zabur. Hamá wahdá ke áiá Abimelekay kerrá watá ganókáni paymá kort, cha ódá dar kanag but o wati ráhá shot.

¹ Dáemá Hodáwandá názénán áiay satá o saná modám mani dapá ent.

² Mani arwáh Hodáwanday sará pahra kant, békebrén mardom beshkonant o shádehi bekanant.

³ Gón man hórigá Hodáwandá mazani bedayét, byáét ke hawáriá áiay námá názénén.

⁴ Hodáwandon shóház kort o maná passawi dát, cha mani sajjahén torsán maná ázáti kort.

⁵ Á ke chammesh gón áiá ent drapshán ant, áyáni dém hechbar sharmsára nabit.

⁶ É meskiná tawár per jat, Hodáwandá áiay tawár eshkot o cha sajjahén sakkián rakkénti.

⁷ Hodáwanday préshtag Hodátorsáni chapp o chágerdá pallé bandit o áyán nejáta dant.

⁸ Bechashét o bechárét ke Hodáwand nék ent, bahtáwar hamá ent ke áiay mayár o báhótha bit.

⁹ Oo Hodáwanday palgártagénán! Cha Hodáwandá betorsét, chiá ke Hodátorsán hech kammié nést.

¹⁰ Warnáén shér mohtáj o shodiga bant, bale Hodáwanday shóház kanókán cha nékiá hech kammié nést.

¹¹ Oo chokkán! Byáét o cha man beshkonét, man shomárá sabaka dayán ke Hodáwandá chón bemannét.

¹² Cha shomá kay pa zendá hodónák ent o wasshén rócháni gendagay lóthók?

¹³ Wati zobáná cha badiá dur bedár o lonthán cha drógá.

¹⁴ Cha badiá per tarr o néki kan, sohl o émeniay shóházá bebay o hameshiay randá bekap.

¹⁵ Hodáwanday chamm gón pahrézkárán ent o góshi ham pa áyáni peryátán pach.

¹⁶ Hodáwanday dém badkáráni helápá ent, tán áyáni yátá cha jaháná beborrit o gomsár bekant.

¹⁷ Wahdé pahrézkár peryáta kanant, Hodáwanda eshkont o áyán cha sajjahén sakkiána rakkénit.

¹⁸ Hodáwand gón proshtadelán nazzik ent o droshtaruhán rakkénit.

¹⁹ Pahrézkárá bázén sakki o sória rasit, bale Hodáwand áiá cha sajjahén sakkiána rakkénit.

²⁰ Áiay sajjahén haddhán mohra dárit, cha áyán yakké ham próshaga nabit.

²¹ Badi badkárá koshit o hamá ke cha pahrézkárá naprata kant, mayárbára bit.

²² Hodáwand wati hezmatkáráni zendá rakkénit, harkas ke áiay báhótha bit, mayárbára nabit.