Zabur 27 - Hodáay Pákén Ketáb Balochi zobáná

Hodáwand mani rozhn o rakkénók ent

Dáuday Zabur.

¹ Hodáwand mani rozhn o rakkénók ent, cha kayá betorsán? Hodáwand mani zenday kalát ent, cha kayá bimmé bebit?

² Wahdé badkár hamlaha kanant ke mani jesm o jáná bederrant o ér bebarant, wahdé dozhmen o badwáh mani sará orosha kanant, á wat thagala warant o kapant.

³ Bell ke lashkaré mani chágerdá wati gedánán mekk bekant, angat mani dela nalarzit, agan jangé ham mani sará bekapit, angat deljam án.

⁴ Cha Hodáwandá yak chizzé lóthetagon o hameshiay pad o randá bán, ke wati zenday sajjahén róchán Hodáwanday lógá jahmenend bebán, tánke Hodáwanday zébáiá begendán o parasteshgáhá cha hamáiá rahshóni belóthán.

⁵ Chiá ke sakki o sóriáni róchá maná wati sáhegá dárit, wati tambuay tahá chéra dant o taláréay sará borzá óshtárénit.

⁶ Nun dozhmenáni angerrá sarperáza bán o gón shádmániáni kukkárá áiay tambuay tahá korbániga kanán, Hodáwandá pa sawt o sáza názénán.

⁷ Oo Hodáwand! Wahdé peryáta kanán mani tawárá beshkon, mani sará rahm kan o passaw beday.

⁸ Taw gwashtag: “Mani chehragay shóházá bebay.” Dela gwashit: “Hodáwandá! Tai chehragay shóházá án.”

⁹ Démá cha man chér maday, wati hezmatkárá gón hezhm per matarrén, taw ke mani madatkár butagay. Oo mani rakkénókén Hodá! Maná dawr maday o yalah makan.

¹⁰ Agan mát o pet ham maná yalah bekanant, Hodáwand wat maná zurit o dasta gipt.

¹¹ Oo Hodáwand! Wati ráhá maná sój day, dozhmenáni sawabá maná rást o tachkén ráhá rahshón bay.

¹² Pa dozhmenáni wáhagá maná yalah makan, chiá ke drógén sháhed mani helápá pád átkagant ke jang o chópay ásá damant.

¹³ Deljam án ke Hodáwanday nékiá zendagénáni zeminá gendán.

¹⁴ Hodáwanday wadárá bay, zórmand bay o delá dhaddh kan. Haw! Hodáwanday wadárá bay.