Zabur 25 - Hodáay Pákén Ketáb Balochi zobáná

Ráhá maná pésh bedár

Dáuday Zabur.

¹ Oo Hodáwand! Man pa del o ján dém pa taw káyán.

² Oo mani Hodá! Tai sará tawkala kanán, mayl ke pashal o sharmendag bebán o dozhmen mani sará báládast bebant.

³ Ji haw! Á ke tai sará óst o ométa kant hechbar sarjahla nabit. Á ke bé sawabá béwapáia kanant sarjahl o sharmendaga bant.

⁴ Oo Hodáwand! Ráhá maná pésh dár o wati keshká maná tálim day.

⁵ Dém pa wati rástiá maná rahshón bay o sabak beday, chiá ke taw mani rakkénókén Hodá ay o sajjahén róchá tai entezár o wadárá án.

⁶ Oo Hodáwand! Wati rahmat o mehrá yát kan, chiá ke á cha azalá hastant.

⁷ Mani warnáiay náparmáni o gonáhán yát makan, wati mehray kesásá maná yát kan ke taw nék ay, oo Hodáwand!

⁸ Hodáwand nék o rást ent, paméshká gonahkárán ráhá sója dant.

⁹ Békebr o darbéshén mardomán rástiay ráhá rahshónia dant, wati keshká áyán pésha dárit.

¹⁰ Hamá ke Hodáwanday ahd o paymánay sará óshtant, áiay sajjahén ráh pa áyán cha mehr o wapáyá sarréch ant.

¹¹ Oo Hodáwand! Pa wati námaygi mani gonáh o mayárán bebaksh, chiá ke mazan ant.

¹² Kay ent hamá ke pa del Hodátors bebit? Hodáwand áiá hamá rástén ráhá sója dant ke báyad ent gechéni bekant.

¹³ Á wati róchán pa séri o azgária gwázénit, áiay chokk o óbádag zeminay mirás baróka bant.

¹⁴ Hodáwand wati delay ráz o ramzán gón Hodátorsán darshána kant, wati ahd o paymáná pa áyán pajjárénit.

¹⁵ Mani chamm modám dém pa Hodáwandá ant, chiá ke hamá ent ke mani pádán cha dámá ázáta kant.

¹⁶ Wati démá gón man bekan o maná rahmat bebaksh, chiá ke man békas o setam distagéné án.

¹⁷ Mani delay sakki o sóri báz ant, maná cha paréshániá berakkén.

¹⁸ Mani ranj o sakkián bechár o sajjahén gonáhánon bebaksh.

¹⁹ Mani dozhmenán bechár ke chinchok báz ant o cha man chón pa kahr naprata kanant.

²⁰ Mani zendá bepahréz o berakkén, mayl ke sharmendag bebán, chiá ke tai báhóth o mayár án.

²¹ Tachki o rásti mani negahpán bát, chiá ke mani omét taw ay.

²² Oo Hodá! Esráilá cha sajjahén sakki o sórián berakkén.