Zabur 2 - Hodáay Pákén Ketáb Balochi zobáná

Hodáay bádsháha kayt, pádáni kapét

¹ Á dega kawm pa ché shóresha kanant o ráj chiá mopt o náhudagén pandala sázant?

² Jahánay bádsháh tayára bant o hákem yakjáh mocch, Hodáwand o áiay Masihay helápá óshtant:

³ “Byáét tán áyáni sád o bandán beborrén o zamzilánesh besendén.”

⁴ Hodáwand ke ásmáná bádsháhia kant kandit o áyán maskará kant.

⁵ Á wahdá wati hezhmay tahá gón áyán habara kant, wati gazabay tahá áyána torsénit:

⁶ “Man wati bádsháh, wati pák o gechénién kóh, Sahyunay sará nendáréntag.”

⁷ Nun Hodáwanday hokmá darshána kanán ke maná gwashti: “Taw mani Bacch ay, maróchi man tará pédá kortag.

⁸ Cha man belóth tán kawmán tai mirás bekanán o zeminay chárén kondháni ráján tai sawgát.

⁹ Gón ásenén asáé áyán prósha dayay o kunzagáni paymá hurt hurtesha kanay.”

¹⁰ Paméshká, oo bádsháhán! Aglmand bebét. Anchosh oo jahánay hákemán! Adab bezurét.

¹¹ Pa tors, Hodáwanday hezmatá bekanét o pa drahag pádáni kapét.

¹² Chokká bechokkét chó mabit ke zahr begipt o shomá ráhay némá gár o bégwáh bebét, chiá ke á anágat bránza gipt. Bahtáwar hamá ant ke áiay mayár o báhótha bant.