Zabur 18 - Hodáay Pákén Ketáb Balochi zobáná

Hodáwand mani talár ent

Pa sázger o washáwázáni sálárá. Hodáwanday hezmatkár Dáuday Zabur. Dáudá é Zabur hamá wahdá pa Hodáwandá per bast ke Hodáwandá cha sajjahén dozhmenán o cha Sháulay dastá rakként. Dáudá chosh gwasht:

¹ Oo Hodáwand, oo mani zór o wák! Tará báz dósta dárán.

² Hodáwand mani talár ent, mani kalát o mani rakkénók ent, mani Hodá mani talár ent o hamáiay poshtá báhóth o mayára bán. Á mani espar ent, mani zórákén rakkénók o mani sangar.

³ Hodáwandá ke satá o sanáay láhek ent tawára kanán o cha wati dozhmenána rakkán.

⁴ Markay sád o bandán maná patátagat o tabáhi o zawáliay hár o hirrópán maná torséntagat.

⁵ Mordagáni jahánay sád o bandán patátagatán o gón markay dámá, dém pa dém atán.

⁶ Wati paréshániáni tahá Hodáwandon tawár jat o komak lóthagay peryáton wati Hodáay gwará borz kort. Áiá cha wati parasteshgáhá mani tawár eshkot o mani komak lóthagay peryát áiay góshán raset.

⁷ Nun zemin chandhet o jomb o jóshá lagget, kóháni béh o bonyát ham larzetant, chiá ke á hezhm geptagat.

⁸ Cha áiay pónzá dutt dar átk o sóznákén ásé cha dapá, taptagén angar zobánok janagá atant.

⁹ Ásmáni ér áwort o jahl átk, syáhén jambar áiay pádáni chérá at.

¹⁰ Karrubiéay bánzoláni sará neshtagat o gwátay bánzoláni sará bál at.

¹¹ Taháróki wati pósháki kort o jambaráni gobár o syáhén hawri wati chágerday kápár kortant.

¹² Rozhn o drapshnáki cha áiá démá at o jambar chest bayagá atant, taptagén seng o ácheshén angar dara kaptant.

¹³ Hodáwandá cha ásmáná grandet o borzén arshay Hodáyá cha taptagén seng o ácheshén angarán wati tawár sar dát.

¹⁴ Áiá wati tir shántant o dozhmen sheng o sháng kortant, gróki dawr dát o sargardáni kortant.

¹⁵ Daryáay ápráh gendag butant o donyáay bonyát paddar, cha tai neherr o hakkalán cha tai pónzay trondén gwátá, oo Hodáwand!

¹⁶ Áiá cha borzádá dast shahárt o maná gepti, cha zyádahén ápá maná dar áworti o

¹⁷ cha zóráwarén dozhmená rakként, cha áyán ke napratesh mani sará próshtagat, chiá ke cha man zórákter atant.

¹⁸ Sakki o sóriáni róchá, mani démá dar átkant, bale Hodáwand mani posht o panáh at.

¹⁹ Áiá maná práh o émenén jágahé áwort o maná rakkénti, chiá ke cha man báz wassh o razá at.

²⁰ Hodáwandá pa mani pahrézkáriá gón man néki kortag, mani dastáni pákiay mozz bakshátag,

²¹ chiá ke man Hodáwanday ráh yalah nadátag o cha Hodáyá dém pa badiá nashotagán.

²² Áiay parmán modám mani chammáni démá butagant o áiay hokm cha wat dur nadáshtagant.

²³ Áiay démá tamán o béayb butagán o watá cha gonáhá dur dáshtag.

²⁴ Hodáwandá mani pahrézkáriáni mozz dátag, áiá mani dastáni páki distag.

²⁵ Taw gón wapádárán wapádár ay o gón tachkénán tachk.

²⁶ Gón pákénán pák ay o gón repkkárán chálák.

²⁷ Chiá ke taw békebrána rakkénay, bale porkebr o gorunákán chamjahla kanay.

²⁸ Oo Hodáwandén Hodá! Taw ay ke mani cherágá rozhnága kanay. Hamá ent ke mani tahárókián róshena kant.

²⁹ Gón tai madatá lashkaréay sará orosh o hamlaha barán o gón Hodáay komaká ent ke cha borzén diwálán koppa kanán.

³⁰ Haw! Hodá, áiay ráh tamán o kámelén ráhé, Hodáay habar béayb ant, pa harkasá ke áiay gwará panáha zurit, esparé.

³¹ Hodáwandá abéd, kay Hodá ent o Hodáyá abéd, kay talár?

³² É Hodá ent ke maná zór o wáka dant o mani ráhá tamán o béayba kant.

³³ Mani pádán áskáni paymá téza kant o maná borziáni óshtagá láhekia dant.

³⁴ Mani dastán pa jangá ázmudaga kant, tán báskon brenjén kamáná beloppénit o chóth bekant.

³⁵ Taw wati sóbén bayagay espará maná bakshay o rástén dastet mani posht o panáh ent, tai narmdeli o békebri maná mazania dant.

³⁶ Taw mani pádáni chéray ráhá práha kanay tánke pádon malarzant.

³⁷ Dozhmenáni randá kapán o mani dast pa áyána rasit, tán halák mabant, pera natarrán.

³⁸ Anchosh zeminá janán ke pád áyagay móh o wákesh mabit, mani pádáni chérá kapant.

³⁹ Taw pa jangá maná zór o wáka bakshay o dozhmenán mani pádáni chérá dawra dayay.

⁴⁰ Mani pádán dozhmenáni gardenay sará éra kanay o man wati dozhmenán gár o gomsára kanán.

⁴¹ Pa komaká peryáta kanant bale rakkénóké nést, cha Hodáwandá komaka lóthant, bale passawa nadant.

⁴² Man áyán háka kanán o gwátá dayán, damk o kuchaháni gelay paymá chandhán.

⁴³ Taw maná cha mardománi jang o chópána rakkénay o kawmáni sardára kanay, hamá mardom mani hezmatá kanant ke manesh pajjáha nayárán.

⁴⁴ Tán mani tawárá eshkonant, parmána barant, darámad mani démá wati sará jahla kanant.

⁴⁵ Á deltrakka bant, larzán o drahán cha wati kalátána tachant.

⁴⁶ Hodáwand zendag ent. Pa mani talárén Hodáyá názénk. Mani rakkénókén Hodáyá shán o shawkat bát.

⁴⁷ Hodá ent ke mani bérá gipt, kawm o ráján mani chérdastiá nádénit o

⁴⁸ maná cha dozhmenána rakkénit. Haw! Taw mani dozhmenáni démá maná sarperáza kanay o cha zálemén mardomána chotthénay.

⁴⁹ Oo Hodáwand! Paméshká tará kawmáni nyámá satá kanán o tai námá názénán.

⁵⁰ Á wati bádsháhá mazanén sób o pérózia bakshit o wati rógen per moshtagéná mehra kant, bezán Dáud o áiay nasl o padréchá tán abad.