Zabur 16 - Hodáay Pákén Ketáb Balochi zobáná

Maná yalaha nakanay

Dáuday shayr.

¹ Oo Hodá! Maná pa sharri bedár, ke tai mayár o báhóth butagán.

² Gón Hodáwandá gwashton: “Taw ay mani Hodáwand, abéd cha taw pa man hech sharrié nést.”

³ Á pák o palgártagén ke zeminá ant, hamá sharapmand ant ke mani sajjahén shádmáni hamáyáni sawabá ent.

⁴ Á ke dega hodáéay randá tachant, áyáni gam o andóh sakk báza bit, áyáni hónén korbánigáni rasmán góna nabán o námánesh wati zobáná nayárán.

⁵ Oo Hodáwand! Taw mani gisshetagén bahrwandh o jám ay, taw mani bahrá sharriay sará dáray.

⁶ Mani hadd o simsar, deltabén jágahán gisshénag butagant, maná delkasshén mirásé dastá kaptag.

⁷ Man Hodáwandá názénán ke maná shawr o saláha dant, delon shappásán ham maná ráh sója dant.

⁸ Man modám Hodáwand wati dém pa démá distag, á mani rástén pahnátá ent, cha hamé sawabá mana nalarzán.

⁹ Paméshká, delon wassh o zobán shádán ent. Jesm o jánon mán ométay kalátá áráma gipt.

¹⁰ Chiá ke taw maná mordagáni jaháná yalaha nakanay o wati dóstdárá sarhag o pussagá naylay.

¹¹ Taw maná zenday ráhá sója dayay o wati bárgáhá maná cha shádmániá sarrécha kanay. Tai rástén kashá, wasshi abadmán ent.