Markás 1 - Hodáay Pákén Ketáb Balochi zobáná

Pákshódókén Yahyáay kolaw

¹ Issá Masih, Hodáay Chokkay wasshén mestágay bongéj o shoruhát.

² Anchosh ke Eshayá Nabiay Ketábá nebeshtah ent: Bechár, man wati kásedá cha taw pésar ráha dayán ke á, tai ráhá tachk o tayára kant.

³ Gyábáná, kasé gwánka jant: Hodáwanday ráhá tayár o áiay keshká rást o tachk bekanét.

⁴ Pákshódókén Yahyá gyábáná záher but o gwánki jat: “Cha wati gonáhán pashómán bebét, tawbah bekanét o pákshódi bekanét ke bakshaga bét.”

⁵ Mardom, cha Yahudiahay sajjahén métag o kallagán o cha Urshalimay shahrá áiay kerrá shotant. Wati gonáhesh mannetant o Yahyáyá Ordonay kawrá pákshódia dátant.

⁶ Yahyáyá cha oshteray pothán gwaptagén póshák gwará at o póstén kamarbandé lánká bastagati. Áiá, madag o gyábáni bénaga wárt.

⁷ Yahyáyá jára jat o gwashti: “Cha man o rand, mardé kayt ke cha man báz zórmandter ent o maná é láheki ham nést ke kóndhán bekapán o áiay kawshbandán bebóján.

⁸ Man shomárá gón ápá pákshódia dayán, bale á shomárá gón Hodáay Pákén Ruhá pákshódia dant.”

Issáay pákshódi o chakkás

⁹ Á róchán, Issá cha Jalilay damagay shahr Náserahá átk o Ordonay kawrá Yahyáay dastá pákshódi dayag but.

¹⁰ Anchosh ke á cha ápá dar áyagá at, disti ke ásmánay dap pach but o Hodáay Pákén Ruh kapótéay dróshomá átk o áiay sará ér nesht.

¹¹ Cha ásmáná é tawár átk: “Taw mani dóstén Bacch ay o man cha taw báz wassh o razá án.”

¹² Hamá wahdá Pákén Ruhá Issá gyábáná rawán dát.

¹³ Á, tán chell róchá gyábáná mant o Shaytán áiá báz chakkásagá at. Ódá jangali jánwar ham gón áiá hór atant o préshtagán áiay hezmat kort.

Chár máhigiray lótháénag

¹⁴ Cha Yahyáay dazgir bayagá rand, Issá Jalilá shot o Hodáay bádsháhiay wasshén mestágay jári jat o

¹⁵ gwashti: “Wahd átkag o rasetag. Hodáay bádsháhi nazzikk ent. Tawbah bekanét o Hodáay wasshén mestágay sará báwar bekanét.”

¹⁶ Issá, Jalilay mazangwarmay lambá rawagá at ke do máhigiri dist, Shamun o áiay brát Andriás, ke pa máhigiriá wati dám o máhórán gwarmá chér géjagá atant.

¹⁷ Issáyá gón áyán gwasht: “Byáét, mani randgiriá bekanét o man shomárá anchosha kanán ke máhig geragay badalá, mardománi delá shekár bekanét.”

¹⁸ Áyán hamá damáná wati dám yalah dát o áiay hamráh butant.

¹⁹ Issá ke kammé démá shot Zebdiay chokk, Ákub o áiay brát Yuhannái distant, ke bójigá neshtagatant o wati máhórán sráchag o sharr kanagá atant.

²⁰ Anchosh ke Issáyá á distant, gwánki jatant. Á doénán, wati pet Zebdi gón kárendahán bójigá yalah dát o Issáay hamráh butant.

Ganókéay jennay kasshag

²¹ Issá o áiay morid Kaparnáhumay shahrá shotant. Shabbatay róchá Issá kanisahá shot o mardomi tálim dátant.

²² Mardom cha áiay dars o sabakkán hayrán atant, chéá ke áiá Sharyatay zánógeráni paymá darsa nadát, gón wák o ehtiáré tálima dát.

²³ Hamé wahdá, kanisahay tahá yakk mardéá ke áiá jenné per at, kukkár kanáná gwasht:

²⁴ “Oo Issá Náseri! Tará gón má che kár ent? Átkagay ke márá gár o tabáh bekanay? Mana zánán taw kay ay, taw Hodáay gechén kortagén hamá Pákén ay.”

²⁵ Issáyá jenn hakkal dát o gwashti: “Wati dapá bedár o é mardá yalah day.”

²⁶ Jenná á mard sakk pretk o zhámbalént o kukkár kanán cha áiá dar átk.

²⁷ Mardomán pa hayráni watmánwatá gwasht: “É chónén habaré? Gwashay nókén tálimé, gón choshén wák o ehtiáré ke jennán ham hokma dant o jenn ham áiay habará mannant.”

²⁸ Dér nagwast ke Jalilay sajjahén kerr o gwarán, Issáyá nám dar áwort.

Nádráháni drahbakshi

²⁹ Issá, anchosh ke cha kanisahá dar kapt, Ákub o Yuhannáay hamráhiá Shamun o Andriásay lógá shot.

³⁰ Ódá, Shamunay wassig tapig at o nepáday sará waptagat. Anchosh ke Issá lógá átk, nádráhay hálesh dát,

³¹ Issá nazzikká shot, áiay dasti gept o pádi kort. Áiay tap kapt, á wassh but o áyáni hezmat kanagá lagget.

³² Bégáhá rónendá rand, mardomán wati nádráh ke áyáni nyámá ganók o jenni ham hastat, Issáay kerrá áwortant.

³³ Shahray sajjahén mardom, lógay dapá mocch butant.

³⁴ Issáyá bázéné dráh kort ke dhawl dhawlén nádráhián geptagatant o bázén ganókáni jenni kasshetant, áiá jenn pa habará naeshtant, chéá ke jennán á pajjáha áwort.

Enjilay wasshén mestágay jár

³⁵ Sabáhá máhallah ke angat tahár at, Issá pád átk, cha lógá dar kapt, yakk gestá o panáhén jágahéá shot o dwái kort.

³⁶ Shamun o áiay hamráh pa Issáay shóházá dar kaptant.

³⁷ Wahdé Issáesh dist, gón áiá gwashtesh: “Sajjahén mardom tará shóház kanagá ant.”

³⁸ Issáyá gwasht: “Byáét dega némagéá berawén, dém pa kerr o gwaray halk o hankénán, tánke man wasshén mestágá berasénán, chéá ke man pa hamé kárá átkagán.”

³⁹ Gorhá, sajjahén Jalilá tarr o tábi kort, kanisaháni tahá wasshén mestágay jári jat o jenniáni jenni ham kasshet o dar kortant.

Garriéay drahbakshi

⁴⁰ Yakk mardé, ke áiá syahgarr at Issáay kerrá átk, kóndhán kapt, dazbandi kort o gwashti: “Agan taw belóthay, maná wassh o palgár korta kanay.”

⁴¹ Issáyá áiay sará sakk bazzag but, dasti shahárt o á mardi dast per mosht o gwashti: “Mana lóthán, wassh o palgár bay.”

⁴² Hamá damáná á mard cha syahgarrá dráh but.

⁴³ Roksat kanagay wahdá, Issáyá kaddhan kort o gwasht:

⁴⁴ “Hozzhár bay. Hechkasá cha é habar o hálá sahig makan. Bale beraw, watá dini péshwáyá pésh bedár o pa wati pák o palgáriá, hamá korbánig ke Mussáay Sharyatá nebisag butag, hayráti bekan tánke pa áyán gwáh o sháhedié bebit.”

⁴⁵ Bale á mard ke cha ódá dar kapt, wati drahbakshiay habari har jáh sheng o tálán kort. É sawabá, nun Issáyá sarzáherá, hecch shahréá shota nakort, dasht o gyábán o gestáén jágahána tarret. Bale angat mardom cha har némagá áiay kerrá átkant.