Songs 116 - Hawaii Pidgin Bible

God Take Kea Me So I No Mahke

¹ I get love an aloha fo Da One In Charge, Cuz wen I tell him I need help, He lissen!

² Cuz Da One In Charge lissen real good, All my life, I goin yell to him Fo help me!

³ Befo time I feel litto mo I goin mahke, Jalike get tight ropes Stay wrap aroun me. I wen feel jalike da Mahke Peopo Place Come on top me awready. I wen had it, cuz plenny trouble Come to me. An me, I stay sad inside.

⁴ Den I yell fo Da One In Charge help me, Cuz I know wat kine god him. I wen pray lidis: “Eh! You Da One In Charge! Try help me! Get me outa trouble, Fo me no gotta mahke!”

⁵ Da One In Charge, he like give peopo chance, An he erytime do wass right fo dem. Oua God, he erytime get pity fo dem.

⁶ Da One In Charge, he take kea Da peopo dat donno wat fo do. Wen I was all hamajang, He get me outa trouble.

⁷ I know notting can bodda me No moa, Cuz Da One In Charge Wen do good tings fo me.

⁸ Cuz you, Da One In Charge, You wen get me outa trouble Fo me no mahke, Az why I no need cry no moa, An fall down.

⁹ Now, ery place I go, I stay nea Da One In Charge Right hea inside dis world Wea peopo live.

¹⁰ Dat time, I wen trus Da One In Charge, No matta I tell, “I get plenny trouble!”

¹¹ Cuz I stay real bum out, I wen tell, “Erybody bulai, An I no can trus nobody!”

¹² So! Wat I can do Fo Da One In Charge Fo all da good tings He wen do fo me, aah?

¹³ I goin tell Da One In Charge “Mahalo plenny!” Cuz I know wat kine god him. An I goin make one drink kine offering, Cuz he wen get me outa trouble.

¹⁴ In front a all God peopo, I goin do eryting I wen promise Da One In Charge fo do!

¹⁵ Wen da peopo mahke Dat stay tight wit Da One In Charge, He goin feel plenny sore inside Cuz a dat.

¹⁶ Eh! You Da One In Charge! I one worka guy fo you, Jalike my muddah was one worka fo you too. An you wen hemo da tight ropes dat wrap aroun me.

¹⁷ I goin call fo you help me, Cuz I know wat kine god you, An I goin make one sacrifice fo you, Fo tell you “Mahalo plenny!”

¹⁸ In front a all God peopo, I goin go do eryting I wen promise Da One In Charge fo do,

¹⁹ Inside da open lanais aroun da Temple Fo Da One In Charge, In da middo a Jerusalem town! Eh you guys! Tell good tings Bout Da One In Charge!