Visirai 9 - Hano Niu Testamen

Gailiman Enjel mwa Uv Bilan Taiva

¹ Haḡe gailiman enjel mwa uv bilan taiva. I nam ḡita visiu be mwa hovi nin mahao vai lol ureure, i mwa lai gaihavan̄i huri matgatavan banoi roro.

² Haḡe visiu mwa havan̄ banoi i ahu gaivu talele mwa mwalue ninia. Haḡe mwa bon̄i ḡoro mahava i mahao, gin ahu gabe mwa mwalue nin banoi.

³ I aia bwilo ram himai alolon ahu nin mahao vai lol ureure. I mwa lai muramura n̄an gea lalainira kun muramuran teltelen tano gagasi.

⁴ I mwa bevea lalainira be rasav gan te bwarebware mwanea sage gai, sage havanau tehe; take rav lol bwarebware sinombu n̄an gabe ram hav lai te dovon̄a non God alun rera.

⁵ Mwa hav mahin̄a tehe be bwilo rai wehi atatu kera geki, take be rav lol rebehira vi gagarasira huri vula gai lima, i gagarasianana, nuḡun gagarasianan teltelen tano be nu ḡagarasi.

⁶ I alolon vula gai lima rav ron̄ gagarasi, take rasav mate te dumwi rav doron be ramen mate dagai, take rasav mate te dumwi.

⁷ Ira bwilo gea gitanara kun gabe hos gabe mwa lol vatuvwaiana huri bwaloana; i ginau gabe mwa dogo la bwatura, gitanara kun gabe gaisosorin bwatu be mwa loliana gin vatan̄oga, i lol matara kun lolmatan atatu,

⁸ i ilura kun ilun ira vavine, i livora kun livon ira laion.

⁹ I bwabwara duluai ran saga ḡorora gin gaisaga kun gabe gaisaga vatu, i silon gabaura mwa datan̄i kun silon hos ivusi be jariot ram ravara i ram rov biluslusi huri bwaloana.

¹⁰ Ḡerera abena i liv kokolo abena la ḡerera be ran gagarasi kun gagarasianan teltelen tano. La ḡerera nora muramura abena be rav lol ḡagaras atatu huri vula gailima.

¹¹ Haḡe ratahigi lavoa mwa muai ḡorora, gabe enjel mwa muai goro banoi roro. Ihana la avoan ata Hibru be Abadon; i la avoana ata krik be Apolion (binihiva be “Lol kaburai”).

¹² Muan ginau hantai mwa nogo i ataguna geki ginau hantai gairua rav mai radu.

¹³ Haḡe gaionon enjel mwa uv bilan taiva. I nam ron̄ silo mwa mai la sigun olta be mwa loliana gin vatan̄oga gaivasi la lolmatan God.

¹⁴ Haḡe silo mwa bevea lalai enjel be mwa haḡo bilan taiva be, “Gov hora lua ira enjel gaivasi be nu vauhira ram du la wai rovo lavoa Iuvretes!”

¹⁵ Mwa hora lua ira enjel gaivasi, huri mahavan taro geki, huri mahavan gubwen̄ geki, i vula geki i taulu geki be ram lol vatuvwai be rai wehi tatan̄an udun sinombu la ureure.

¹⁶ Haḡe mwa bev tovtovon sinombun bwaloana gaivua be ram do la hos, tovtovona kun tari vudolu varua.

¹⁷ Lol hueri, nan ḡita ira hos mai atatu be ram rovo alura, i tigoro be mwa duḡoro lolon bwabwara nu memea kun gabi, i ran vatmwetoga, i nu an̄oga kun salva. I bwatun hos kera gea ran ḡun bwatun laion, i gabi tabwalue mai ahu mai salva mwa mwalue nin lolvwara.

¹⁸ Haḡe udun tatan̄an sinombu la ureure ran mate gin tatan̄an harova gaitolu gea: gabi mai ahu i salva be mwa mwalue nin lolvwan ira hos.

¹⁹ Huria be muramura non ira hos duluai mwa du la bwan̄ora mai ḡerera. I ḡerera duluai kun teltele duluai mai bwatura. I ḡerera geki huria be rav lol ḡagaras sinombu ginia.

²⁰ I sinombu duluai maira duluai gabe nu hav wehira tehe huri harova geki, ram hav van te burigai nin vahalana gabe kera sibora ran lolia. I kera ram ḡogonai radui vui son̄son̄o, sage nun vatan̄oga mai vatlegiga, i vatmerameraga, vatu i gai gabe ram hav lago te dumwi, sage roron̄tai, sage ram hav gita te dum ute.

²¹ Sage ginau kera gea rasav vinihi te leahi dumwi, nin wehiwehi te bonogai, sage vui son̄son̄o, sa taḡana sage surana.