Visirai 8 - Hano Niu Testamen

Gaibitun Tigoro

¹ I mahavana be nitui sipsip mwa n̄andu gaibitun tigoro, ute mwa buhiga lol ute ata amare huri mahavan taro vwarate n̄ava maragai.

² I nam ḡita ira enjel gaibitu gabe ram du la lolmatan God, i ram haḡo taiva gaibitu.

³ Haḡe enjel vwate mulei mwa haḡo gaihaḡon gai bonboni be nu loliana gin vat an̄oga mwa mai mwa du aben olta. Ram lai gaibonboni ivusi be men taua alolona. Ira ahun gaibonboni gea ram bulu mai tataro non sinombu non God. Enjel gea mwa hogoi gin ginau duluai gea lolmatan olta be nu loliana gin vatan̄oga i mwa du la lolmatan tanon togotogon ratahigi.

⁴ Haḡe ahun gaibonboni be mwa onda mwa hae mai tataro non sinombu non God nin liman enjel be mwa du la lolmatan God.

⁵ Haḡe enjel mwa lai gaibonboni oda mwa hogonia gin gabi be mwa du la olta, i mwa bulainia vai lol ureure. Aia dumdumwianan bwahilo, mai vilehi i bwahilo mwa dabwariri i mwa sogai.

Enjel Gaibitu ram Uv Taiva

⁶ Haḡe nam ḡita ira enjel gaibitu mai taiva gaibitu be ramen uvwia.

⁷ I muan enjel mwa uv bilan taiva. I vatu mai gabi mwa bulu roiroi mai daga mwa onda mwa himai vai lol ureure. Haḡe tabwahan ureure vwate mwa oda kaburai, i tabwahan tatan̄an gai mwa oda kaburai, i ira bwatmwanea bwaro mulei ram oda.

⁸ Haḡe gairuan enjel mwa uv bilan taiva. Haḡe ginau vwate gitanana nuḡun vusi gaivua be mwa oda i mwa bohainia hivo vai lol tahi. I mahavan tabwahan tahi vwate mwa bogi gi daga,

⁹ i tabwahan tatan̄an ginau rahu ata lol tahi mwa mate, i tavalun tatan̄an waḡa mwa lolian kaburai.

¹⁰ Haḡe gaitolun enjel mwa uv bilan taiva. I visiu gaivua kun here, i mwa hovi nin mahao vai lol tatan̄an ira wairovo i ira mata vuravuran wai.

¹¹ (Ihan visiu be “Garagara.”) Haḡe gaitolun tatan̄an wai mwa bogi mwa ḡaragara, i sinombu ram mwin wai ram mate, bwatuna be mwa bogi mwa ḡaragara.

¹² Haḡe gaivasin enjel mwa uv bilan taiva, i tavihen alo vwate mwa hovi, i kunia mulei tavihen vula i tavihen visiu mulei, huri be tavalun gigitan alo mwa bano; i aia gigita sigai huri udun tavihen rani i udun tavihen boni.

¹³ Haḡe nam ḡarere i nam ḡita dum mala gabe mwa ḡaga haehae la mahava, mwa bevea gin silo gaivua mwa bevea be, “Vi hantai! Vi hantai! Vi hantai havava vi hantai maragai lalai sinombu be ram dogo lol ureure mahavana be silo rav mwalue nin ira enjel gaitolu be rav uv bilara taiva!”