Visirai 16 - Hano Niu Testamen

Ira Disi An̄oga huri Lolhoro non God

¹ Haḡe nam ron̄ silo gaivua mwa mwalue nin imwa tataro lalai ira enjel gaibitu mwa bevea be: “Gin mwalue hivo ba salil lolhoro non God nin disi gaibitu vai lol ureure?”

² Muan enjel mwa hivo mwa salil non disi vai lol ureure. I ginau hahantai mai manuga gagarasi mwa bavora alun ira hei gabe ram bul dovon̄a non ginau rahu turu aluna, i alura gabe ran gogonai nununa.

³ Haḡe gairuan enjel mwa salil non disi alun tahi, i tahi mwa mai kun gabe dagan atatmate, i ginau rahu duluai ata lol tahi ram mate.

⁴ Haḡe gaivasin enjel mwa salil non disi alun wai rovo duluai, mai ira matavuravuran wai rovo duluai, i ram bogi gi daga.

⁵ I nam ron̄ enjel gabe mwa muai ḡoro ira wai mwa bevea be, “Silo vevegi be gom laia nu vavtutu, Giḡo n̄an gon Sabuga, gom dogo kadogaha, i vai tuai!

⁶ Kera gea ram salil dagan sinombu non God mai ira atatun vevsera, i gom lai daga lalainira be rav mwinua. Ram lai vevegi huri nora vahalana!”

⁷ I nam ron̄ silo mwa himai nin olta mwa bevea be, “Ratahigi God mwasin Roron̄o! Gon mwasigi i gon vavtutu liu alun nom vevegi duluai!”

⁸ Haḡe gaivasin enjel mwa salil non disi alun alo, i mwa mahin̄ainia be vi oda sinombu gin hahavwanina be kun gabi.

⁹ I ram onda gin mataguianan odana, i ram uloi hantai ihan God, gabe mwa muramura ḡoro ira harova kerageki. Take rasav van te burigai dum nin vurora i ram hav lol te roroai huri non vatavuha.

¹⁰ Haḡe gailiman enjel mwa salil non disi alun tanon togotogon ute ratahigi non ginau rahu turu gea. I ute meto mwa dariḡoro ute ratahigi non ginau rahu turu gea, i sinombu ram ḡas meara huri nora gagarasi,

¹¹ i ram av hantai lalai God amare, huri nora gagarasi mai manuga. Take ram hav tabagilu te mulei nin nora lalaḡov hahantai.

¹² I gaionon enjel mwa salil non disi alun wai rovo lavoa Iuvretes, i wai lavoa mwa bweu huri ira ratahigi lavoa be ram mai nin halan al tomare.

¹³ Haḡe nam ḡita vui hantai gaitolu be la gitavanara ḡun vorok. Kera ram mwalue nin lolvwan drakon, mai lolvwan ginau rahu turu, i lolvwan atatun vevsera tentene.

¹⁴ Kera haḡea ira vui son̄son̄o gabe ram lol lalan̄an ginau dan̄an̄a. Ira vui gaitolu kera geki ram mwalue vai lol ureure huri ira ratahigi lavoa ata lol ureure, be rav laira vai ute gaituvwa huri bwaloana la gubwen̄in tomareana non Ratahigi God mwasin Roron̄o.

¹⁵ “Giv roron̄tai! Inau nam mai kun gabe susurana! Samwarana lalai wani gabe mwa dogo mwa mamata ḡaoḡao ḡoro ira gaisagana, huria be sihav lago te dum vuroi be men busbusi lolmatan atatu!”

¹⁶ Haḡe ira vui ram lai ira ratahigi lavoa vai ute gaituvwa lol ute gabe lalainira ata Hibru mwa uloinia be Amakedon.

¹⁷ Haḡe gaibitun enjel mwa salil non disi vai la mahava. Haḡe silo gaivua mwa mwalue nin tanon togotogon ratahigi alolon imwa tataro, mwa bevea be, “Nu nogo kadogaha!”

¹⁸ Haḡe mwa bilehi i mwa bwahilo, i dumdumwianan bwahilo mwa roro mwa maragabaga, i mwa sogai rava. La bwativun ureure be nu tau atatu havava mwa botu aia, sogai vwate sigai radu kunia: geki haḡea sogai hantai nin ira sogai duluai!

¹⁹ Haḡe bwatutun vanua gaivua mwa hara bora gi tavihen gaitolu, i ira bwatutun vanua ata lol tatan̄an vanua duluai ram masalan̄ai. God mwa binihi dum bwatutun vanua gaivua Babilon i mwa lolia mwa mwin waen alolon non laha, waen ata alun non lolhoro.

²⁰ Ira vanua duluai ram binogonogo, i ira vus holomare duluai ram maharavi.

²¹ Vat lalavoa ram bihovihovi nin mahao vai alun atatu, i vatu kera gea be si laiana na marahin gaituvwa si dadariha kun kilo n̄avul gailima. Haḡe atatu ram av hantai vai alun God, bwatuna be harova gea nu hantai maragai lalainira.